વાયુ / વાવાઝોડાની રાજ્યમાં અસર, અનેક વિસ્તારોમાં ભારે પવન સાથે વરસાદ

સુરતમાં ભારે પવન સાથે ધોધમાર વરસાદ શરૂ થઇ ગયો છે. સુરતના રાંદેર, મારોભાગલ, દાંડીરોડ વિસ્તારમાં ભારે વરસાદ પડી રહ્યો છે. ત્યારે હાલ સુરત મનપાની 100 સભ્યોની રેસ્ક્યૂ ટીમ સ્ટેન્ડબાય રખાઇ છે. ઉપરાંત સિવિલ હોસ્પિટલમાં 30 બેડ રિઝર્વ કરાયા છે, સાથે જ ચોર્યાસી, ઓલપાડના કાંઠા વિસ્તારના 31 ગામોની શાળાઓમાં રજા આપી દેવાઇ છે. વાવાઝોડાની અસરને કારણે બપોર બાદ 50 કિલોમીટરની ઝડપે પવન ફૂંકાઇ શકે છે.

આ તરફ દેવભૂમિ દ્વારકા જિલ્લાના વાતાવરણમાં પણ પલટો આવ્યો છે. તો દરિયો પણ તોફાની બનતા 15 થી 20 ફૂટ જેટલા ઊંચા મોજા ઊછડી રહ્યા છે. જેના કારણે દરિયા કિનારા નજીક ન જવા માટે લોકોને સૂચના આપી દેવામાં આવી છે. તો કાંઠા વિસ્તારોમાં સુરક્ષા બંદોબસ્ત પણ ચૂસ્ત ગોઠવી દેવામાં આવ્યો છે. જ્યારે જામનગર જિલ્લામાં તેજ પવન ફુંકાઈ રહ્યો છે. તો સમગ્ર શહેરમાં વાતાવરણમાં પલટો આવ્યો છે અને કાળા ડિબાંગ વાદળો ઘેરાયા છે.

તો ભાવનગરમાં વરસાદની શરૂઆત થઈ છે. જિલ્લાના પાલીતાણા, ઈશ્વરીયા, સિહોર, મહુવા, સોનગઢમાં વરસાદ પડ્યો છે. વહેલી સવારથી વાદળછાળા વાતાવરણ વચ્ચે વરસાદ પડી રહ્યો છે. આ ઉપરાંત વાવાઝોડાની અસર બોટાદમાં જોવા મળી રહી છે. બોટાદમાં કેટલાક વિસ્તારોમાં મોડીરાતથી જ વરસાદ શરૂ થઇ ગયો છે. ગઢડા સહિતના વિસ્તારોમાં વરસાદ શરૂ થયો છે.