અમદાવાદ ક્રાઇમ બ્રાંચની ટીમે બાતમીના આધારે કે ચાંદખેડા વિસ્તારમાં આવેલા રોયલ ઓર્ચિડ બંગલોઝના સાત નંબરના બંગલામાં આઇપીએલ પર મેચ રમાડતા બુકીઓને ઝડપ્યાં છે
Share
ચાંદખેડાના બંગલામાં ક્રાઇમ બ્રાંચ ત્રાટકી
12 બુકીઓ સટ્ટો રમાડતાં રંગેહાથ ઝડપાયા
મોટા માથાંનાં નામ ખૂલે તેવી શક્યતા
આઇપીએલ આવે ત્યારે બુકી અને ખેલીઓ માટે દિવાળી આવી હોય તેવો માહોલ થઇ જાય છે. આઇપીએલની સીઝન દરમિયાન કરોડો રૂપિયાની હાર-જીત થાય છે. બુકી અને ખેલીઓની આઇપીએલ બગાડવા માટે પોલીસ તેમજ ક્રાઇમ બ્રાંચ પણ ખૂબ મહેનત કરતાં હોય છે. પોલીસ દારૂ-જુગારના અડ્ડા પકડવાના બદલે સટ્ટો રમતા લોકોને ઝડપી પાડવા માટેનું ખાસ અભિયાન હાથ ધરતી હોય છે. ગઇ કાલે ક્રાઇમ બ્રાંચે ચાંદખેડાના એક બંગલામાં આઇપીએલ મેચ પર સટ્ટો રમાડતા 12 બુકીઓની ધરપકડ કરી છે, જ્યારે સોલા વિસ્તારમાંથી એક ખેલીને ઝડપી પાડ્યો છે.
ઓનલાઇન સટ્ટો રમાડતા હતા
અમદાવાદ ક્રાઇમ બ્રાંચની ટીમને બાતમી મળી હતી કે ચાંદખેડા વિસ્તારમાં આવેલા રોયલ ઓિર્ચડ બંગલોઝના સાત નંબરના બંગલામાં આઇપીએલ પર મેચ રમાડતા બુકીઓ છે. બંગલો ભાડે રાખીને બુકી મોબાઇલ ફોન મારફતે ઓનલાઇન આઇપીએલ પર સટ્ટો રમાડી રહ્યા છે. બાતમીના આધારે ક્રાઇમ બ્રાંચની ટીમે દરોડા પાડ્યા હતા અને બંગલામાં સટ્ટો રમાડતા ભવરલાલ ચૌધરી, અશોકરામ સૈન, અશોકદાસ સંત, ભીયારામ ડુકિયા, પ્રકાશ ઉર્ફે મુન્નો માળી, કિશન જાટ, આસુરામ ચૌધરી, ઘેવરચંદ જાટ, કેશારામ ચૌધરી, રાજેન્દ્ર પ્રજાપતિ, સુનીલકુમાર ગૌતમ, દિલીપ ગૌતમની ધરપકડ કરી લીધી હતી.
બુકીઓ પાસેથી ક્રાઇમ બ્રાંચને લેપટોપ તેમજ વિદેશી ચલણી નોટ મળી આવી છે. ક્રાઇમ બ્રાંચે તમામની ધરપકડ કરીને પૂછપરછ કરતાં સામે આવ્યું છે કે રવીન્દ્ર ઉર્ફે રવિ માળી અને જીતુ માળીના ઇશારે કામ કરતા હતા. તમામ બુકીઓ ઓનલાઇન સટ્ટો રમાડતા હતા, જેમાં કરોડો રૂપિયાની હાર-જીત થતી હતી. રોયલ ચેલેન્જર બેગલોર અને રાજસ્થાન રોયલ્સ વચ્ચે ચાલી રહેલી મેચ ઉપર બુકીઓ ઓનલાઇન સટ્ટો રમાડતા હતા, જેનો કરોડો રૂપિયાનો હવાલો સીધો બેન્કમાં થતો હતો.
બંગલો ભાડે રાખીને બુકી ઓનલાઇન સટ્ટો રમાડી રહ્યા હતા
બુકીઓએ અલગ અલગ વ્યક્તિઓના નામે બેન્ક એકાઉન્ટ ખોલાવ્યાં હતાં અને કસ્ટમર્સનાં ઓનલાઇન આઇડી પણ બનાવ્યાં હતાં, જેમાં તે બેલેન્સ કરીને આપતા હતા. ખેલી બુકીઓને રૂપિયા આપે તે પ્રમાણે ઓનલાઇન આઇડી બનાવીને આપતા હતા. ઝડપાયેલા બુકી રવીન્દ્ર માળી અને દિલીપ સોલંકી તેમજ જીતુ માળીના એકાઉન્ટમાં ટ્રાન્સફર કરાવતા હતા. ક્રાઇમ બ્રાંચને લેપટોપમાંથી કરોડો રૂપિયાનો હિસાબ મળ્યો છે ત્યારે ખેલીઓનું લિસ્ટ પણ મળી આવ્યું છે, જેના આધારે તપાસનો ધમધમાટ શરૂ કર્યો છે. ચાંદખેડામાં થયેલા ક્રિકેટ સટ્ટાના પર્દાફાશમાં મોટા ગજાના બુકીઓની સંડોવણી ખૂલે તેવી પણ શક્યતા છે. બંગલો ભાડે રાખીને બુકી ઓનલાઇન સટ્ટો રમાડી રહ્યા હતા, જેથી ક્રાઇમ બ્રાંચે તેની તપાસ તેજ કરી છે.
બુકીઓ પાસેથી કરોડો રૂપિયાનો હિસાબ મળ્યો
જાહેર રોડ પર મોબાઇલમાં સટ્ટો રમતો ખેલી ઝડપાયો ક્રાઇમ બ્રાંચની ટીમ ગઇ કાલે ઘાટલોડિયા વિસ્તારમાં પેટ્રોલિંગમાં હતી ત્યારે તેમને બાતમી મળી હતી કે સોલા વિસ્તારમાં આવેલા ગુલાબ ટાવર નજીક એક વ્હાઇટ કલરની કાર ઊભી છે, જેમાં એક યુવક કોલકાતા નાઇટ રાઇડર્સ અને ચેન્નાઇ સુપર કિંગ્સ વચ્ચે રમાઇ રહેલી મેચમાં સટ્ટો રમી રહ્યો છે. ક્રાઇમ બ્રાંચ તાત્કાલિક ઘટનાસ્થળે પહોંચી ગઇ હતી, જ્યાં એક યુવક વ્હાઇટ કારમાં બેઠો હતો અને સતત મોબાઇલ ફોનમાં એક્ટિવ હતો. ક્રાઇમ બ્રાંચે યુવકને કોર્ડન કરીને તેની અટકાયત કરી લીધી હતી. યુવકનું નામ નિશાંત પટેલ છે અને તે સતાધાર રહે છે. તેણે ઓઢવના બુકી ભદ્રેશ પટેલ પાસેથી મેચનું આઇડી લીધું હતું. ક્રાઇમ બ્રાંચે નિશાંત પટેલ અને ભદ્રેશ પટેલ વિરુદ્ધ ગુનો દાખલ કર્યો છે. હાલ ક્રાઇમ બ્રાંચે ભદ્રેશને ઝડપી પાડવા માટે ચક્રો ગતિમાન કર્યાં છે.
