મદદ / 'ચપ્પલના તળિયા ઘસાઇ ગયા પણ કોઈ સાંભળતું ન હતું', મહિલા કર્મચારીની બદલી માટે કોંગ્રેસના MLAએ કર્યા હતા ધરણા

• આરોગ્ય કમિશનર કચેરી બહાર કોંગી MLAના ધરણા
• ફાર્માસિસ્ટની બદલીની કરી હતી માગ
• આખરે ફાર્માસિસ્ટની કરાઇ બદલી

ગાંધીનગરમાં આરોગ્ય કમિશનરની કચેરી બહાર  બાયડના ધારાસભ્ય જશુ પટેલના ધરણા બાદ આસિસ્ટન્ટ ફાર્માસિસ્ટ હેતાબેન ચૌધરીને ધનસુરા ખાતે પ્રતિનિયુક્ત કરાયા છે. પોતાના વિસ્તારના એક સ્થાનિક હેતાબેનની માગ હતી કે તેઓની બદલી ધનસુરામાં કરવામાં આવે. છેલ્લા ઘણા સમયથી હેતાબેન બદલીની માગ કરી રહ્યા હતા.. તેમના કોમાગ્રસ્ત પિતાની સારવાર માટે ઘણા સમયથી તેઓએ બદલીની માગ કરી હતી.જશુ પટેલ આ રજૂઆતને લઇને છેલ્લા 6 મહિનાથી કચેરીના ધક્કા ખાઇ રહ્યા હતા.પરંતુ કોઇ ઉકેલ ન આવતા તેમણે ધરણાંનો સહારો લેવો પડ્યો હતો.

અહીં પૈસાના વ્યવહાર ચાલે છે- જશુ પટેલ

જશુ પટેલની રજૂઆત આખરે સ્વીકારવામાં આવી પરંતુ તેઓએ આક્ષેપ લગાવ્યો છે કે છેલ્લા છ માસથી મારા ચપ્પલના તળિયા ઘસાઇ ગયા પરંતુ કોઇ રજૂઆત સાંભળતુ ન હતુ. અહીં માત્ર પૈસાના વ્યવહાર ચાલી રહ્યા છે. દલાલી સિસ્ટમ ચાલે છે. તેમણે વધુમાં જણાવ્યુ કે અહીં અધિકારીઓની જ મનમાની ચાલે છે. ધારાસભ્ય સાથે કેવી રીતે વર્તન કરવુ તે પણ ખબર નથી.