ઈમાનદારી / ગુજરાતમાં અહીં ચાલે છે 'ભરોસાની' દુકાન, નથી બેસતો દુકાનદાર છતાં ચાલે છે વેપાર

• આ છે ઈમાનદારીનો માપદંડ
• અહીં બેસતો નથી દુકાનદાર
• 24 કલાક ખૂલી રહે છે દુકાન

પરંતુ છોટાઉદેપુર જિલ્લાના નાનકડા એવા કેવડી ગામના લોકો માટે પ્રામાણિક બની રહેવું તે જાણે સામાન્ય વાત બની ગઈ છે. અહીં જે કરિયાણાની દુકાન આવી છે તે ગામલોકો માટે પ્રાણાણિકતાનો માપદંડ બની ગઈ છે. કેમ કે, 24 કલાક ખૂલી રહેતી એ દુકાનને ક્યારેય તાળુ મારવામાં આવતું નથી. 

છોટા ઉદેપુરના ગામડામાં આવેલી આ દુકાનને નથી લાગતા તાળા 

આપે મોટા શહેરોમાં એવા અનેક શો રૂમ જોયા હશે જેને રાત્રે તાળા લાગેલા હોય છતાં સિક્યુરિટીગાર્ડની જરૂર પડતી હોય છે. આ રીતે રાખવામાં આવતી સિક્યુરિટી સભ્યસમાજની પ્રામાણિકતાની ચાડી ખાય છે. પરંતુ મહાનગરોથી ઘણે દૂર એવા છોટા ઉદેપુર જિલ્લાના અંતરિયાળ અને જંગલ વિસ્તારમાં આવેલી એક દુકાનને આજ સુધી કોઈ તાળાની જરૂર નથી પડી. 

લોકો સ્વયંભૂ રીતે વસ્તુ લઇને નાણા પેટીમાં મૂકી દે છે

આ કરિયાણાની દુકાન છોટાઉદેપુર તાલુકાના કેવડી ગામમાં આવેલી છે. અનેક પ્રકારના માલસામાનથી લદોલદ આ દુકાનની ખાસિયત એ છે કે આ દુકાનને કયારેય તાળું મારવામાં આવતું નથી. આદિવાસી લોકોના વિસ્તાર વચ્ચે આવેલી આ દુકાનમાંથી ગ્રાહકો જાતે જ વસ્તુ પસંદ કરીને લઈ જાય છે અને  સ્વયંભૂ રીતે જ વસ્તુની કિંમતના નાણા પેટીમાં મૂકી દે છે. નાના બાળકોને નાસ્તો જોઈતો હોય કે, પુખ્ત નાગરિકોને જીનવ જરૂરી ચીજ વસ્તુ જોઈતી હોય, અહી સેલ્ફ સર્વિસને સહુ કોઈ અનુસરે છે અને પૈસા ચૂકવવામાં પ્રામાણિકતા દાખવે છે.  

24 કલાક ખૂલી રહેતી દુકાનમાં દુકાનદાર જ નથી હોતા 

નવાઈની વાત એ છે કે, 24 કલાક ખૂલી રહેતી આ દુકાનમાં મોટાભાગે દુકાનદાર હાજર હોતા જ નથી. દુકાનદારની ગેરહાજરીમાં પણ ગ્રાહકો પ્રામાણિકતાથી ગલ્લામાં પૈસા મૂકી દે છે. જો ક્યારેક ગ્રાહક પાસે  પૈસા ન હોય તો ફોન કરીને દુકાનદારને જાણ કરી દે છે. આ રીતે આ દુકાન અહીં વર્ષોથી ચાલે છે. જો કે તેમ છતાં આજ સુધી ક્યારેય દુકાનમાંથી ખપત થયેલી વસ્તુ સામે ગલ્લામાંથી પૈસા ઓછા નીકળ્યા હોય તેવું બન્યું નથી. એટલું જ નહીં નવાઈની વાત એ છે કે, ચોવીસ કલાક ખૂલી રહેતી આ દુકાનમાં ક્યારેય ચોરીનો બનાવ પણ બન્યો નથી.  

ઈમાનદારીની મશાલ 

વર્ષો અગાઉ આ દુકાન ચાલુ કરી હતી ત્યારથી આવી જ રીતે આ દુકાન ચાલે છે. એટલું જ નહી આ દુકાનના સંચાલક મુસ્લીમ છે અને મોટાભાગના ગ્રાહકો હિંદુ છે. તેમની વચ્ચે માત્ર વેપારી અને ગ્રાહક તરીકેના સંબંધો નથી. ગામના કોઈપણ નાગરિકને આર્થિક મુશ્કેલી હોય તો પણ દુકાનદાર સાહિદભાઈ ગામ લોકોને ખૂબ જ મદદરૂપ બને છે. એક નાનકડા એવા ગામમાં પ્રજવલિત આ કોમી એખલાસ અને ઈમાનદારીની મશાલ કાયમ રોશન રહે તેવી વીટીવી તરફથી નવા વર્ષે શુભેચ્છા.