- ઑગસ્ટમાં 100% ઈથેનોલથી ચાલતાં વાહનનું થશે લૉન્ચિંગ
- ગડકરીએ કહ્યું કે તેનો ખર્ચ થશે માત્ર 15 રૂપિયા પ્રતિ લીટર
- મર્સિડીઝ બેંઝનાં ચેરમેન સાથેની વાતચીત અંગેની પણ આપી માહિતી
થોડા દિવસો પહેલાં કેન્દ્રીય મંત્રી નીતિન ગડકરીએ મુંબઈ ખાતે થયેલ એક કાર્યક્રમમાં ઈથેનોલનાં વાહનોનાં લૉન્ચિંગ અંગેની જાહેરાત કરી હતી. હવે તેમણે નાગપુર ખાતે યોજાયેલ કાર્યક્રમમાં આ વાહનોની કંપની અને ખર્ચ અંગેની મોટી ઘોષણા કરી છે. જો આ ઈથેનોલથી ચાલતી ગાડીઓ ભારતમાં લૉન્ચ થાય છે તો તેનો સૌથી વધુ ફાયદો મધ્યમ વર્ગને થઈ શકે છે. આ સાથે જ પર્યાવરણમાં પ્રદૂષણનું પ્રમાણ પણ ઘટાડવવામાં ઈથેનોલ વાહનો મદદરૂપ સાબિત થઈ શકે છે.
40% વીજળી પણ જનરેટ થશે
કેન્દ્રીય મંત્રી નીતિન ગડકરીએ કહ્યું કે તેઓ ઑગસ્ટ મહિનામાં ટોયોટા કંપનીની કેમરી કાર લૉન્ચ કરશે જે 100% ઈથેનોલથી ચાલશે. એટલું જ નહીં આ કાર 40% વીજળી પણ પેદા કરશે.
ખર્ચ માત્ર 15 રૂપિયા પ્રતિ લીટર
નીતિન ગડકરીએ કહ્યું કે જો તમે તેની તુલના પેટ્રોલ સાથે કરશો તો આ કારનો ખર્ચ માત્ર 15 રૂપિયા પ્રતિ લીટર રહેશે. તેમણે એક કાર્યક્રમમાં કહ્યું કે તેમણે હાલમાં જ મર્સિડીઝ બેંઝ કંપનીનાં અધ્યક્ષની મુલાકાત કરી હતી જેમણે ઈલેક્ટ્રિક વાહન લૉન્ચ કર્યું છે. મર્સિડીઝનાં ચેરમેને તેમને કહ્યું કે તેઓ ભવિષ્યમાં માત્ર ઈલેક્ટ્રિક વાહન જ બનાવશે. તેમણે કહ્યું કે અમે નવા વાહનો લાવી રહ્યાં છીએ જે સંપૂર્ણપણે ઈથેનોલથી ચાલશે. બજાજ, TVS અને હીરો સ્કૂટર 100% ઈથેનોલ પર ચાલશે.
કઈ રીતે સસ્તું પડશે આ વાહન?
ગડકરીએ સસ્તી ગાડીનો દાવો કરતાં કહ્યું કે ઈથેનોલનો ભાવ 60 રૂપિયા પ્રતિ લીટર છે જ્યારે પેટ્રોલનો ભાવ 120 રૂપિયા પ્રતિ લીટર છે. પરંતુ આ વાહન 40% વીજળી પણ ઉત્પન્ન કરશે એટલે કે તેની કિંમત 15 રૂપિયા પ્રતિ લીટર કહેવાશે.
