- ભાજપે 7માંથી 3 સીટો પર મેળવી જીત
- યૂપીનાં ઘોસીમાં ભાજપને લાગી શકે છે ઝટકો
- સપાનાં સુધારકરસિંહ 25 હજાર વોટથી આગળ
દેશમાં INDIA અને NDA ગઠબંધનનાં શક્તિ પ્રદર્શનની વચ્ચે 6 રાજ્યોની 7 વિધાનસભા સીટો માટેની પેટાચૂંટણીનાં ચોંકાવનારા પરિણામો આવ્યાં છે. ભાજપે કુલ 7માંથી 3 સીટો પર જીત મેળવી છે પરંતુ યૂપીનાં ઘોસીમાં સપા ભાજપથી આગળ ચાલી રહી છે. અત્યાર સુધી ઘોસીમાં સપાનાં સુધારકર સિંહ 25 હજાર વોટથી આગળ ચાલી રહ્યાં છે. તો ભાજપનાં દારાસિંહ ચૌહાણ દ્વિતીય નંબર પર છે. આ સિવાય TMC, કોંગ્રેસ અને ઝારખંડ મુક્તિ મોર્ચાને પણ એક-એક સીટ મળી છે.
ભાજપની આ સીટો પર જીત
ભાજપ માટે સૌથી સારા સમાચાર ત્રિપુરાથી આવ્યાં છે. ધનપુર અને બોક્સાનગર સીટ પર ભાજપ જીતી ગઈ છે. આ રીતે ભાજપે ત્રિપુરામાં પોતાની સરકાર ટકાવી લીધી છે. બોક્સાનગરથી ભાજપનાં તફજ્જલ હુસૈન અને ધનપુરથી બિંદુ દેબનાથ ચૂંટણીનાં મેદાનમાં ઊતર્યાં હતાં. તો બીજી તરફ ઉત્તરાખંડની બાગેશ્વર સીટ પર પણ ભાજપ જીતી ગઈ છે. અહીં ભાજપની પાર્વતી દાસે કોંગ્રેસ ઉમેદવાર બસંત કુમારને અઢી હજાર વોટથી માત આપી છે.
ઘોસીની સીટ પર સપા
ઉત્તરપ્રદેશમાં ઘોસીની સીટ પર અખિલેશ યાદવને સફળતા મળતી દેખાઈ રહી છે. સપા કેંડિડેટ સુધારકરસિંહે ભાજપનાં દારાસિંહને પાછળ મૂક્યાં છે. હાલમાં જેટલો અંતર છે એ જોઈને સપાની જીત આ સીટ પર થાય તેવું લાગી રહ્યું છે.
અન્ય પાર્ટીઓની સ્થિતિ
ડુમરી સીટ પર ઝારખંડ મુક્તિ મોર્ચાની બેબી દેવી 15 હજાર વોટથી જીતી ગઈ છે. EDની રેડ અને ભ્રષ્ટાચારનાં આરોપોની વચ્ચે CM હેમંત સોરેન માટે આ મોટી રાહત છે. બંગાળની ધુપગુડી સીટ પર TMCનાં ઉમેદવાર નિર્મલ ચંદ્ર રૉય 4000 વૉટથી જીત્યાં છે. કોંગ્રેસને માત્ર એક જગ્યાએથી ખુશ ખબર મળી છે. કોંગ્રેસનાં ઉમેદવાર ચાંડી ઓમાને કેરળનાં પુથુપલ્લી સીટ પર વિજય મેળવ્યો છે.
