અમદાવાદ / મારાથી જોશમાં ભૂલ થઇ ગઇઃ ભાજપના થાવાણીએ પોતાની કરતૂત માટે માગી માફી

લોકોમાં વ્યાપક રોષ અને ભાજપ હાઇકમાન્ડે નારાજગી વ્યક્ત કરતાં બલરામ થાવાણીએ આખરે માફી માગી હતી. જ્યારે ચોતરફથી દબાણના કારણે અંતમાં પોલીસે ફરિયાદ નોંધી સેકન્ડ પાર્ટનો ગુનો નોંધ્યો છે. 

નરોડાના ધારાસભ્ય બલરામ થાવાણીએ મહિલા સાથે લુખ્ખાગીરી કરી માર મારવાના ચકચારી કિસ્સામાં પોલીસ સમગ્ર ઘટનાને દબાવવનો પ્રયાસ કરી રહી હોવાના આક્ષેપ ઉઠ્યા છે. મોડી રાત્રે બલરામ થાવાણી સહિત ભાજપના કોર્પોરેટર અને કાર્યકર્તાઓ મેઘાણીનગર પોલીસ સ્ટેશનમાં ઊમટી પડતાં રીતરસરનું ભાજપ કાર્યલય બની ગયું હોય તેવું લાગી રહ્યું હતું.

પોલીસે ભોગ બનનાર મહિલાની હજુ સુધી ફરિયાદ નહીં નોંધતાં વિવાદ વધુ ગરમાયો છે. ભોગ બનનારનું પોલીસ નિવેદન લીધું હોવા છતાંય પોલીસે ફરિયાદ નહીં નોંધતાં મામલો ગરમાયો છે. મોડી રાત્રે સમગ્ર ઘટનાને દબાવવા માટે બલરામ થાવાણી સહિતના નેતાઓએ મહિલા સાથે સમાધાન કરવા માટે પ્રયત્નો કર્યો હતો જ્યારે પોલીસે પણ તેમને સાથ આપીને મહિલાને સમજાવી હતી. 



નરોડામાં પાણીની વિકટ સમસ્યાને પગલે રવિવારે મહિલાઓ સ્થાનિક ધારાસભ્યની ઓફિસની બહાર વિરોધ નોંધાવી રહ્યા હતા. દરમિયાન મહિલાઓ સાથે વાતચીત કરી રહ્યા હતા, ત્યારે વાત વણસતાં ધારાસભ્ય બલરામ થાવાણી અને તેમના મળતિયાઓએ મળી મહિલાને ઢોર માર માર્યો હતો. જેના પગલે નાસભાગ મચી ગઇ હતી. જાહેરમાં મહિલાને માર મારવાનો વીડિયો સોશિયલ મીડિયા પર વહેતો થયો હતો.