ટકરાવ / જયેશ રાદડિયા જૂથને મોટો ફટકો, દરખાસ્ત મંજૂર થાય તે પહેલા જ હરદેવસિંહ જાડેજા જુથનો દાવ

• રાજકોટના પડાસણ મંડળીમાં 'પ્રીત ખાંડાની ધાર'
• જાડેજા-રાદડીયા જૂથ ખુલીને આમને સામને 
• રાજકોટ જિલ્લા બૅન્કમાં રાદડીયાની ગેરરીતિ ? 

રાજકોટના જિલ્લા સહકારી ક્ષેત્રમાં ભાજપનો જૂથવાદ સપાટી પર આવી ગયો છે. જેમાં જયેશ રાદડિયા અને હરદેવસિંહ જાડેજા જૂથ વચ્ચે ટકરાવ જોવા મળી રહ્યો છે. આ જૂથવાદમાં જયેશ રાદડિયા જુથને મોટો ફટકો પડ્યો છે. જેમાં રાદડિયા જુથના મહેશ આસોદરિયાને પડાસણ મંડળીમાંથી દૂર પણ કરી દેવામાં આવ્યા છે. જેમાં અગાઉ હરદેવસિંહ જાડેજા જૂથના વિજય સખિયાને દૂર કરી મહેશ આસોદરિયાના નામની દરખાસ્ત મુકવામાં આવી હતી. હવે જ્યારે મહેશ આસોદરિયાને પડાસણ મંડળીમાંથી દૂર કરી દેવામાં આવ્યા છે 

જેથી તેઓની લોધિકા સંઘમાં એન્ટ્રી મુશ્કેલ બની ગઈ છે. આપને જણાવી દઈયે કે, થોડા દિવસ પહેલા હરદેવસિંહ જાડેજા જૂથના સભ્યો ગાંધીનગરમાં સહકાર વિભાગના સચિવ સમક્ષ બેન્કમાં ભરતીના ગોટાળા મુદ્દે રજૂઆત કરવા પહોંચ્યા હોવાની ખબર સામે આવી હતી.જેમાં જયેશ રાદડિયા વિરૂદ્ધ રાજકોટ જિલ્લા બૅન્કની 1100કર્મીઓની ભરતીમાંથી 900 લોકોની ભરતીમાં ગેરરીતિ આચરી હોવાનો આક્ષેપ લગાવવામાં આવ્યો છે.

કહેવાય છે કે સહકારી ક્ષેત્રના 4 અસંતુષ્ટ સિનિયર આગેવાન વિજય સખિયા, પરસોતમ સાવલિયા, નીતિન ઢાંકેચા અને હરદેવસિંહ જાડેજા રાજ્ય સરકારમાં જયેશ રાદડિયા વિરુદ્ધ ગાંધીનગરમાં રજૂઆત કરી હતી. ચારેય આગેવાનોનો આક્ષેપ છે કે રાજકોટ જિલ્લા બેંકની ભરતીમાં જયેશ રાદડિયાએ ભ્રષ્ટાચાર કર્યો છે.