અકસ્માત / આ રુટ પર ફરી દુર્ઘટનાનો શિકાર થઈ વંદે ભારત એક્સપ્રેસ ટ્રેન, ગાયને ટક્કર મારતા આગળના બોનેટના ઉડયાં ફુરચા

• વંદે ભારત એક્સપ્રેસનો ફરી એકવાર અકસ્માત.
• ગાય ટકરાવાને કારણે ટ્રેનને નુકસાન. 
• અગાઉ પણ વંદે ભારત ટ્રેન ઘટનાનો શિકાર થઈ હતી. 

દેશની પહેલી સેમી હાઈસ્પીડ ટ્રેન વંદે ભારત એક્સપ્રેસનો ફરી એકવાર અકસ્માત થયો છે. દિલ્હીથી ભોપાલ આવી રહેલ ટ્રેન ગ્વાલિયરમાં દુર્ઘટનાનો શિકાર થઈ છે. ટ્રેનની સામે ગાય આવતા સાંજે 6:15 વાગ્યે આ દુર્ઘટના સર્જાઈ છે. ગાય ટકરાવાને કારણે ટ્રેનનું બોનટ ખુલી ગયું અને આગળના ભાગને નુકસાન થયું છે. 

આ ઘટના સર્જાયા પછી વંદે ભારત એક્સપ્રેસ ટ્રેન 15 મિનિટ સુધી ગ્વાલિયરના ડબરા સ્ટેશન પર ઊભી રહી હતી. ટ્રેન જોવા માટે આસપાસ લોકોની ભીડ ઊમટી હતી. રેલવેના ટેકનિકલ સ્ટાફ દ્વારા સ્ટેશન પર બોનટને સાજુ કરવામાં આવ્યું, ત્યારબાદ ટ્રેન રવાના કરવામાં આવી હતી. અગાઉ પણ વંદે ભારત ટ્રેન ઘટનાનો શિકાર થઈ હતી. 

આ રૂટ પર 1 એપ્રિલના રોજ વંદે ભારતને લીલી ઝંડી દેખાડવામાં આવી હતી
પ્રધાનમંત્રી નરેન્દ્ર મોદીએ 1 એપ્રિલના રોજ ભોપાલથી મધ્યપ્રદેશને પહેલી વંદે ભારત ટ્રેનને લીલી ઝંડી બતાવીને રવાના કરી હતી. આ ટ્રેન શરૂ થઈ તેને એક મહિનાનો સમય પણ થયો નથી અને આ પ્રકારની ઘટના સર્જાઈ છે. વંદે ભારત એક્સપ્રેસથી ભોપાલના રાની કમલાપતિ સ્ટેશનથી નવી દિલ્હી સ્ટેશન સુધીના સફરમાં 7 કલાક અને 50 મિનિટનો સમય લાગશે. 

વારંવાર વંદે ભારત ટ્રેન સાથે પશુઓ ટકરાવાને કારણે રેલવે તંત્ર ખૂબ જ ચિંતિત છે. આ પ્રકારની ઘટનાઓ રોકવા માટેની કોશિશ કરવામાં આવી રહી છે. ભારતીય રેલવે આધુનિકતા પર ભાર વધુ આપી રહ્યું છે. રેલવે સ્ટેશનને અપગ્રેડ કરવામાં આવી રહ્યા છે. નવી નવી હાઈ સ્પીડ ટ્રેન લોન્ચ થઈ રહી છે. આ સંદર્ભે સરકારે 400 વંદે ભારત ટ્રેન ચલાવવાનો નિર્ણય કર્યો છે. 

રેલવે મંત્રી અશ્વિની વૈષ્ણવે જણાવ્યું હતું કે, મરાઠવાડા રેલ કોચ ફેક્ટરીમાં વંદે ભારત એક્સપ્રેસ ટ્રેનના 1,600 ડબ્બાનું નિર્માણ કરવામાં આવશે. જેમાં 8-9 કરોડનો ખર્ચ થશે. વંદે ભારત ટ્રેન પ્રતિ કલાક 200 કિમીથી વધુની રફ્તાર આપશે.