- ભજન લાલ શર્માને સોંપવામાં આવી રાજસ્થાનની કમાન
- રાજસ્થાનનાં CM તરીકે ભજન લાલ શર્મા લેશે શપથ
- સાંગાનેરની સીટ પરથી પહેલીવખત ધારાસભ્ય બન્યાં હતાં ભજનલાલ
ભજન લાલ શર્મા એક ભારતીય રાજકરણી છે જેમને હાલમાં રાજસ્થાનનાં મુખ્યમંત્રી તરીકેની મોટી જવાબદારી ભાજપ દ્વારા સોંપવામાં આવી છે. ભાજપ વિધાયક દળની બેઠકમાં ભજનલાલ શર્માનાં નામ પર સર્વસમ્મતિથી મોહર લગાડવામાં આવી છે. તેઓ રાજસ્થાન વિધાનસભાનાં સદસ્યનાં રૂપમાં સાંગાનેર વિધાનસભા ક્ષેત્રનું પ્રતિનિધિત્વ કરે છે.
કોણ છે ભજન લાલ શર્મા?
ભજન લાલ શર્મા ચાર વખત ભારતીય જનતા પાર્ટીનાં મહાસચિવ બન્યાં છે. 2023ની આ ચૂંટણીમાં સાંગાનેર વિધાનસભા ક્ષેત્રની ચૂંટણીમાં ભજનલાલે કોંગ્રેસનાં ઉમેદવાર પુષ્પેંદ્ર ભારદ્વાજને 48081 વોટનાં અંતરથી હાર આપી હતી. ભાજપે તેમને પહેલીવાર જયપુરની સાંગાનેર જેવી સુરક્ષિત સીટ પરથી ચૂંટણી લડાવી હતી. વર્તમાન ધારાસભ્ય અશોક લાહોટીની ટીકિટ કાપીને ભજનલાલ શર્માને ઉમેદવાર બનાવવામાં આવ્યું હતું. આ જીત બાદ તેઓ પહેલી વખત ધારાસભ્ય બન્યાં છે. અને હવે તેમને રાજસ્થાનની કમાન સોંપી દેવામાં આવી છે.
4 વખત ભાજપ પ્રદેશ મહામંત્રી
56 વર્ષીય ભજનલાલ શર્માની શૈક્ષણિક યોગ્યતાની વાત કરીએ તો તેમણે માસ્ટર્સની ડિગ્રી પ્રાપ્ત કરી છે. તેમના અનેક બિઝનેસ છે. સંગઠનમાં તેમની મહત્વપૂર્ણ ભૂમિકાને ધ્યાનમાં લેતાં તેમને રાજસ્થાનનાં મુખ્યમંત્રી તરીકેની મોટી જવાબદારી સોંપવામાં આવી છે. તેઓ 4 વખત ભાજપ પ્રદેશ મહામંત્રી રહી ચૂક્યાં છે. RSS અને ABVP સાથે પણ તેઓ લાંબા સમયથી સંકળાયેલા છે.
ભજનલાલ શર્માની નેટવર્થ
તેમની નેટવર્થની વાત કરીએ તો તેઓ પણ કરોડપતિ છે અને તેમની પાસે કુલ 1.40 કરોડ રૂપિયાની સંપત્તિ છે. જ્યારે 35 લાખ રૂપિયાનું દેણું છે. વિધાનસભા ચૂંટણીમાં આપવામાં આવેલ સંપત્તિની માહિતી અનુસાર તેમની નેટવર્થમાંથી આશરે 1,15000 રૂપિયા કેશમાં છે જ્યારે વિવિધ બેંકોનાં એકાઉન્ટમાં તેમનાં 11 લાખ રૂપિયા ડિપોઝિટ છે.
બ્રાહ્મણ સમાજથી આવે છે ભજન લાલ શર્મા
ભજન લાલ શર્મા ભરતપુરનાં રહેવાસી છે. બાહરી હોવા છતાં પણ તેમણે સાંગાનેરમાં મોટી જીત હાસિલ કરી હતી. ભજન લાલ શર્મા સંઘ અને સંગઠન બંનેના ઘણાં નજીક હતાં. માહિતી અનુસાર વસુંધરા રાજેએ તેમના નામનો પ્રસ્તાવ આપ્યો હતો. ભજન લાલ શર્મા બ્રાહ્મણ સમાજથી આવે છે. રાજસ્થાનમાં પણ આશરે 7% આબાદી બ્રાહ્મણ છે.
ડેપ્યુટી CM અને સ્પીકર
દીયા કુમારી અને પ્રેમ ચંદ્ર બેરવાને રાજસ્થાનનાં ઉપમુખ્યમંત્રી તરીકેની જવાબદારી સોંપવામાં આવી છે. જ્યારે વાસુદેવ દેવનાની વિધાનસભાનાં સ્પીકર રહેશે.
