- 12 જુલાઈથી ટીમ ઈન્ડીયા જશે વેસ્ટ ઈન્ડીઝના પ્રવાસે
- કુલ 10 મેચ રમશે જેમાં 2 ટેસ્ટ, 3 વનડે અને 5 ટી-20 સામેલ
- BCCIએ ટીમ ઈન્ડીયાની ટૂરનું શિડ્યુઅલ જાહેર કર્યું
ટીમ ઇન્ડિયાને રવિવારે વર્લ્ડ ટેસ્ટ ચેમ્પિયનશિપ (ડબલ્યુટીસી)ની ફાઇનલમાં ઓસ્ટ્રેલિયાના હાથે 209 રનથી હારનો સામનો કરવો પડ્યો હતો. ટાઈટલ મેચ પુરી થયા બાદ ભારતીય ક્રિકેટ બોર્ડે સોમવારે વેસ્ટ ઈન્ડિઝ પ્રવાસનો કાર્યક્રમ જાહેર કરી દીધો છે. ભારતીય ટીમ જુલાઈ અને ઓગસ્ટમાં વેસ્ટ ઈન્ડિઝના પ્રવાસે જશે. ભારત આ સમયગાળામાં બે ટેસ્ટ, ત્રણ વન ડે અને પાંચ ટી-20 ઈન્ટરનેશનલ મેચ સહિત ટોટલ 10 મેચ રમશે જેમાંથી 2 મેચ અમેરિકામાં રમાડવાનું ગોઠવ્યું છે.
વેસ્ટ ઈન્ડીઝમાં ક્યાં ક્યાં રમાશે મેચ
BCCIએ તેના સત્તાવાર ટ્વિટર એકાઉન્ટ પર આ કાર્યક્રમની જાહેરાત કરી હતી. ભારત અને વેસ્ટ ઈન્ડિઝ વચ્ચે પ્રથમ ટેસ્ટ 12 થી 16 જુલાઈ દરમિયાન ડોમિનિકાના વિન્ડસર પાર્કમાં યોજાશે, જ્યારે બીજી ટેસ્ટ 20 થી 24 જુલાઈ દરમિયાન ત્રિનિદાદના ક્વિન્સ પાર્ક ઓવલમાં યોજાશે. 27 જુલાઈથી વન-ડે શ્રેણીનો પ્રારંભ થશે. 50 ઓવરના ફોર્મેટની પ્રથમ અને બીજી મેચ બાર્બાડોસના કેન્સિંગ્ટન ઓવલ ખાતે યોજાશે. બીજી મેચ 29 જુલાઇના રોજ છે. સાથે જ આ સિરીઝની છેલ્લી મેચ 1 ઓગસ્ટથી ક્વીન્સ પાર્ક ઓવલમાં રમાશે. બંને ટીમો 3 ઓગસ્ટથી ટી-20 શ્રેણીમાં ટકરાશે.
અમેરિકાના ફ્લોરિડામાં બે મેચ રમાશે
ભારત અને વેસ્ટ ઈન્ડિઝ વચ્ચે અમેરિકાના ફ્લોરિડામાં આખરી બે ટી-20 મુકાબલા ખેલાશે. ચોથી મેચ 12 ઓગસ્ટે અને પાંચમી મેચ 14 ઓગસ્ટે ફ્લોરિડાના બ્રોવર્ડ કાઉન્ટી સ્ટેડિયમમાં યોજાશે.
