- તુજે અબ જિંદા નહીં છોડેંગે, ઊઠા લો ઉસકો ઔર ડાલ દો ગાડી મેં..
- અમદાવાદમાંએસ્ટેટ બ્રોકરના અપહરણનો પ્રયાસ
- પોલીસે તપાસના ચક્રો ગતિમાન કર્યા
ભદ્રકાળીનાં મંદિરે દર્શન કરવા માટે વહેલી પરોઢે ઘરથી નીકળેલા એસ્ટેટ બ્રોકરના મોં પર ચાદર નાખીને અપહરણ કરવાની કોશિશ કરાતાં ચકચાર મચી ગઇ છે. એસ્ટેટ બ્રોકર તેમના મિત્ર સાથે દર્શન કરવા માટે જતા હતા ત્યારે આ બનાવ બન્યો હતો. તુજે અબ જિંદા નહીં છોડેંગે, ઊઠા લો ઉસકો ઔર ડાલ દો ગાડી મેં કહીને એસ્ટેટ બ્રોકરને કારમાં બેસાડી દીધા હતા અને બાદમાં સોનાના ચેઇનની લૂંટ કરી દીધી હતી. જોકે એસ્ટેટ બ્રોકરે બળ પ્રયોગ કરીને કારથી ઊતરીને ભાગી જતાં તે બચી ગયા હતા. એસ્ટેટ બ્રોકરનું અપહરણ જૂના ઝઘડાની અદાવત રાખીને કરવામાં આવ્યું હોવાનો પર્દાફાશ થયો છે.
તુજે અબ જિંદા નહીં છોડેંગે,
નિકોલ વિસ્તારમાં આવેલા વિરાટનગરમાં રહેતા રમેશભાઇ દેસાઇએ બાપુનગર પોલીસ સ્ટેશનમાં લગધીર દેસાઇ સહિત પાંચ લોકો વિરુદ્ધ અપહરણ તેમજ લૂંટની ફરિયાદ કરી છે. રમેશભાઇ દેસાઇ જમીન લે વેચનો ધંધો કરીને પોતાનું તેમજ પરિવારનું ગુજરાન ચલાવે છે. રમેશભાઇ દર રવિવારે સવારના મિત્રો સાથે લાલ દરવાજા ખાતે આવેલા ભદ્રકાળી મંદિરમાં ચાલતા દર્શન કરવા માટે જાય છે. ગત રવિવારના દિવસે રમેશભાઇ તેમજ તેમનો મિત્ર સાગર દેસાઇ સવારે પાંચ વાગ્યાની આસપાસ ઘરેથી ચાલતા ચાલતા ભદ્રકાળી મંદિરે દર્શન કરવા માટે જતા હતા ત્યારે બાપુનગર મરઘાં ફાર્મ રોડ પાસે બે શખ્સ દોડતા આવ્યા હતા. જેમની પાછળ એક કાર પણ હતી. બંને શખ્સના હાથમાં ચાદર હતી. જે રમેશભાઇના મોં પર નાખી હતી. બંને શખ્સ ગંદી ગાળો બોલીને રમેશભાઇને કહેવા લાગ્યા હતા કે તુજે અબ જિંદા નહીં છોડેંગે, ઉઠા લો ઉસકો ઔર ડાલ દો ગાડી મેં. બંને શખ્સોએ બળનો પ્રયોગ કરીને રમેશભાઇને અપહરણ કરવાના ઇરાદે કારમાં બેસાડી દીધા હતા.
રમેશભાઇએ કારનો નંબર લઇ લીધો
ગાડીમાં બેસતાંની સાથે જ રમેશભાઇએ મોં પરથી ચાદર હટાવી દીધી હતી. જેથી ડ્રાઇવરે તેમના ગળામાંથી ચેઇન લૂંટી લીધી હતી. રમેશભાઇ બળનો ઉપયોગ કરીને કારમાંથી ઊતરી ગયા હતા અને બાદમાં સીધા મિત્ર સાથે ભાગવા લાગ્યા હતા. દરમિયાનમાં અપહરણકર્તાઓ પણ ત્યાંથી નાસી છુટ્યા હતા. રમેશભાઇએ કારનો નંબર લઇ લીધો હતો. જેના આધારે તેમણે પોલીસ ફરિયાદ કરવાની જગ્યાએ તપાસ કરાવી હતી.
અપહરણનું કાવતરું ઘડાયું
સેન્ટ્રો કાર વસ્ત્રાલના કર્મયોગ સોસાયટીમાં રહેતા કનૈયાલાલ લુહારની હોવાનું સામે આવ્યું હતું. રમેશભાઇએ કનૈયાલાલ લુહારને આ બાબતે પૂછ્યું તો તેણે જણાવ્યું હતું કે બે દિવસ પહેલાં તેમની સોસાયટીમાં રહેતા લગધીર દેસાઇને થોડા દિવસ ચલાવવા માટે આપી હતી. રમેશભાઇ અને લગધીર દેસાઇ વચ્ચે થોડા સમય પહેલાં બબાલ થઇ હતી. જેની અદાવત રાખીને તેમનાં અપહરણનું કાવતરું ઘડાયું હતું. રમેશભાઇએ સમગ્ર મામલે બાપુનગર પોલીસ સ્ટેશનમાં હકીકત જણાવી હતી. જેથી પોલીસે લગધીર દેસાઇ સહિત પાંચ લોકો વિરુદ્ધ ગુનો દાખલ કરીને તપાસ શરૂ કરી છે.
મિત્રતામાં કાર આપી અને તેનો દુરુપયોગ કર્યો
કનૈયાલાલ લુહારની સોસાયટીમાં લગધીર દેસાઇ રહે છે. જેણે મિત્રતામાં શુક્રવારના દિવસે કાર ચલાવવા માટે આપી હતી. કનૈયાલાલને સપનાંમાં પણ ખબર ન હતી કે લગધીર દેસાઇ તે કારનો ઉપયોગ ગુનાખોરી આચરવા માટે કરવાનો છે. લગધીર દેસાઇએ કનૈયાલાલની કારને તેના મળતિયાઓને આપી હતી. જેમાં તેણે રમેશભાઇનું અપહરણ કરવાની કોશિશ કરી હતી. હજુ પણ લગધીર દેસાઇએ કાર કનૈયાલાલને આપી નથી. બાપુનગર પોલીસે લગધીર દેસાઇ સાથે અન્ય કોણ કોણ સંડોવાયેલા છે તે મામલે તપાસનો ધમધમાટ શરૂ કર્યો છે.
