નિયુક્તિ / મહિલા દોડવીર હિમા દાસની સિદ્ધિઓને મળ્યું સન્માન, પોલીસતંત્રમાં આ મહત્વની જવાબદારી સોંપાઈ

• ભારતીય દોડવીર હિમદાસને નિયુક્તિ પત્ર અપાયું 
• આસામ પોલીસમાં ડીએસપીના પદ પર મળી નિમણૂંક
• મુખ્યમંત્રી સોનોવાલે એક કાર્યક્રમમાં આપ્યું નિયુક્તિ પત્ર 

આસામના મુખ્ય પ્રધાન સર્વાનંદ સોનોવાલે આજે ભારતીય રમતવીર હિમા દાસને નિમણૂકનો પત્ર આપવાની ઔપચારિકતા નિભાવી હતી. રાજ્યની 'ઇન્ટિગ્રેટેડ સ્પોર્ટ્સ પોલિસી' હેઠળ દાસની ડીએસપી પદ પર નિમણૂક કરવામાં આવી છે. આજે તેમને સરુઝાઇ સ્પોર્ટસ કોમ્પ્લેક્સ ખાતે નિમણૂક પત્ર આપવામાં આવ્યો હતો. મુખ્યમંત્રીએ આસામ પોલીસમાં નવા ભરતી થયેલા 597 સબ ઈન્સ્પેક્ટરને નિમણૂક પત્રો પણ આપ્યા હતા.

મુખ્યમંત્રી સોનોવાલે પાઠવી શુભેચ્છાઓ 

આ પ્રસંગે મુખ્યમંત્રીએ નવનિયુક્ત સબ ઇન્સ્પેક્ટર અને તેમના પરિવારજનોને શુભેચ્છા પાઠવી હતી. મહત્વનું છે કે યુવાઓને રમત-ગમતને કારકિર્દી તરીકે અપનાવવા પ્રોત્સાહિત કરવા, રાજ્ય સરકારે એકીકૃત રમત નીતિ લાગુ કરી હતી. મુખ્ય પ્રધાન સોનોવાલે કહ્યું કે, "રાજ્ય સરકારે દોડવીર હિમા દાસને આસામ પોલીસમાં નાયબ પોલીસ અધિક્ષક તરીકે નિયુક્ત કર્યા છે કારણ કે રાષ્ટ્રીય અને આંતરરાષ્ટ્રીય દૃશ્ય પર તેમની સિદ્ધિઓથી તેમણે રાજ્યને ગૌરવ અપાવ્યું છે."

હું મારી કારકીર્દિ ચાલુ રાખીશ: હિમા દાસ

હિમા દાસે કહ્યું, "હું શાળાના દિવસથી જ પોલીસ અધિકારી બનવા માંગતી હતી. મારી માતાનું પણ આ જ સ્વપ્ન હતું. તે હંમેશાં મને દુર્ગાપૂજા દરમિયાન આશીર્વાદ આપતા હતા. માતા ઇચ્છતા હતા કે હું આસામ પોલીસમાં સેવા આપું. દરેક આ રમતના લીધે મળી રહી છે. " હિમાએ વધુમાં કહ્યું, "આસામ પોલીસ માટે કામ કરતી વખતે પણ હું મારી કારકીર્દિ ચાલુ રાખીશ. સાથે સાથે હું આસામને હરિયાણા જેવી રમતોમાં શ્રેષ્ઠ પ્રદર્શન કરનાર રાજ્ય બનાવવાનો પ્રયત્ન કરીશ."