- PAAS નેતા દિનેશ બાંભણીયાનું નિવેદન
- અસિત વોરાને પદ પરથી દૂર કરો;દિનેશ
- AAPનેતા મહેશ સવાણી સાથે કરી મુલાકાત
પેપરલીક કાંડ મામલે PAAS નેતા દિનેશ બાંભણિયાએ નિવેદન આપતા કહ્યું છે કે, યુવાનો અસિત વોરાની આગેવાનીમાં પરીક્ષાઓ નથી ઈચ્છતા અને અસિત વોરાને પદ પરથી દૂર કરવામાં આવે. તેમણે એમ પણ કહ્યું કે, અમે કોઈ પક્ષનુ સમર્થન કે વિરોધ નથી કરતા. બાંભણીયાએ ઉમેર્યું કે, વિદ્યાર્થીઓના મુદ્દે AAP નેતા મહેશ સવાણી ઉપવાસ પર બેઠા હોવાથી મળવા આવ્યા છીએ,જો ભાજપ નેતાઓ વિદ્યાર્થીઓના મુદ્દે ઉપવાસ કરશે તો તેમને પણ મળવા આવીશું.
મુખ્યમંત્રી સાથે સૂચક મુલાકાત
આ પૂર્વે હેડ ક્લાર્ક પેપર લીકનો મામલો આખા ગુજરાતમાં એટલો ગાજ્યો છે કે આમાં ગૃહરાજ્યમંત્રી બાદ હવે ખુદ મુખ્યમંત્રી ભૂપેન્દ્ર પટેલે પણ દખલગીરી કરવાની ફરજ પડી છે. હેડક્લાર્કની પરીક્ષા રદ્દ કરવાની જાહેરાત બાદ હવે મુખ્યમંત્રીએ GSSSBના ચેરમેન અસિત વોરાને મળવા બોલાવ્યા હતા. જે બાદ અસિત વોરાના રાજીનામાની અટકળો તેજ થઈ ગઈ છે. અંદર ખાને શું રંધાઈ રહ્યું છે તેની માહિતી લીક થઈ છે, ખાસ સૂત્ર દ્વારા મળતી માહિતી મુજબ CM પટેલ સાથેની બેઠકમાં અસિત વારોને જવાબદારીની રાહે રાજીનામુ આપી દેવાની વાત કહેવામા આવી છે.
ટ્વીટર પર ઉમેદવારો માંગી રહ્યા છે અસિત વોરાનું રાજીનામું
ત્યારે હવે ગુજરાતની સરકારી પરીક્ષાની ભરતીની તૈયારી કરતાં ઉમેદવારોએ જાણે સોશિયલ મીડિયાના સહારે આંદોલનનું બ્યૂગલ ફૂંકી દીધું છે. ટ્વીટર પર #Resign_Asitvora જોરદાર રીતે ટ્રેન્ડ થઈ રહ્યું છે. ટ્વીટર પર ઉમેદવારો અસિત વોરાનું રાજીનામું માંગી અલગ અલગ મીમ મૂકી રહ્યા છે. પેપરલીક કાંડમાં અસિત વોરાના રાજીનામાની માગ થઇ રહી છે. ત્યારે ટ્વીટર પર #Resign_Asitvora નામે 1.62 લાખ ટ્વીટ થતાં ગાંધીનગર સુધી ઉમેદવારોનો મૂડ પહોંચ્યો હોય તેવુ દેખાઈ રહ્યું છે.
