આકરું પગલું / અરવલ્લી જિલ્લા પોલીસ વડાનું એક્શનઃ હેડ કોન્સ્ટેબલ સહિત 3 કર્મચારીઓ સસ્પેન્ડ, જાણો સમગ્ર મામલો

 

• અરવલ્લી જિલ્લા પોલીસ વડાએ હેડ કોન્સ્ટેબલ સહિત 3ને કર્યા સસ્પેન્ડ
• CCTVમાં હેડ કોન્સ્ટેબલ અર્જુન ગઢવી સહિત બે કર્મીઓ થયા હતા કેદ
• ઇજાગ્રસ્તના પરિવારજનોએ મેઘરજ પોલીસમાં નોંધાવી હતી ફરિયાદ

મેઘરજમાં પોલીસકર્મીઓ દ્વારા દારૂની હેરાફેરી મામલે જિલ્લા પોલીસ વડાએ આકરી કાર્યવાહી કરી છે. અરવલ્લી જિલ્લા પોલીસ વડાએ મેઘરજ પોલીસ સ્ટેશનના હેડ કોન્સ્ટેબલ સહિત ત્રણ કર્મચારીઓને સસ્પેન્ડ કરવામાં આવ્યા છે. સાથે જ સમગ્ર પ્રકરણની તપાસ ડીવાયએસપી હેડ ક્વાર્ટરને સોંપવામાં આવી છે. મહત્વનું છે કે, દારૂ ભરેલી કારનો બાઇક સાથે અકસ્માત થતાં સમગ્ર ભાંડો ફૂટ્યો હતો.

હેડ કોન્સ્ટેબલ સહિત ત્રણ પોલીસ કર્મી સસ્પેન્ડ
જિલ્લા પોલીસ વડાએ મેઘરજ પોલીસ સ્ટેશનના  હેડ કોન્સ્ટેબલ અર્જુન ગઢવી, જતીન રાકેશભાઈ, વિજય ગોબરભાઈને સસ્પેન્ડ કર્યા છે. મેઘરજના માલપુર રોડ પર કાર ચાલકે બાઇક લઈને જતા ચાલકને અડફેટે લીધો હતો. આ કાર બાઇકને ટક્કર મારી પંચાલ રોડ પર એક દુકાન આગળ ઊભી રહી હતી. જ્યાં આ કારમાંથી દારૂની પેટીઓ બીજી કારમાં ટ્રાન્સફર કરવામાં આવી હતી. આ સમગ્ર ઘટના દુકાનના સીસીટીવી કેમેરામાં કેદ થઈ ગઈ હતી. 

CCTV આવ્યા હતા સામે
અકસ્માત કરનાર કારમાંથી દારૂની પેટીઓ ટ્રાન્સફર કરતા સીસીટીવી સામે આવ્યા હતા. સીસીટીવીમાં હેડ કોન્સ્ટેબલ અર્જુન ગઢવી સહિત બે કર્મીઓ કેદ થયા હતા. તો ઈજાગ્રસ્ત યુવકના પરિવારજનોએ મેઘરજ પોલીસ સ્ટેશનમાં ફરિયાદ નોંધાવી હતી. 

શું છે સમગ્ર મામલો?
અરવલ્લીના મેઘરજમાં પોલીસ દારૂની હેરાફેરીના કરતા હોવાનું ખુલ્યું હતું. પોલીસ સ્ટેશનનો હેડ કોન્સ્ટેબલ અર્જુન ગઢવી દારૂની હેરાફરી કરતાના CCTV સામે આવ્યા હતા. અકસ્માત બાદ દારૂ અન્ય કારમાં ભરી પોલીસકર્મી ફરાર થયો હતો. દારૂ ભરેલી કારનું પાયલોટિંગ કરતા હોવાની પણ વિગત સામે આવી હતી.

સ્થાનિકોએ શુ કહ્યું ?
સ્થાનિકોએ જણાવ્યું હતું કે, માલપુર ચોકડી પર દારૂ ભરેલી કારનો બાઈક સાથે અકસ્માત થયો હતો. તેમણે કહ્યું હતું કે, તે ગાડી સાઈડમાં મુકીને જતા રહ્યાં અને પછી તે ગાડીમાંથી બે-ચાર પોલીસવાળાએ દારૂ ક્રોસિંગ કર્યું જે બાબતના CCTV પણ છે.