આત્મશ્લાઘા / નારાજ ગણાતા ભાજપના નેતાનો હૂંકાર, કહ્યું- તમે ચિંતા ન કરો હું જસદણ બેઠકથી લડવાનો છું

• રાજકોટમાં કુંવરજી બાવળીયા નું સૂચક નિવેદન 
• જસદણ બેઠક પરથી 'હું જ લડી રહ્યો છું આગામી ચૂંટણી'
• બાવળીયાનું નિવેદન સમયોચિત ? કે પૂર્વ ધારણા ? 

રાજકોટ કલેકટર કચેરીમાં લાંબા સમય બાદ મળેલી ફરિયાદ સંકલન સમિતિની બેઠકમાં ભાગ લેવા પહોચેલા રાજ્યના પૂર્વ મંત્રી કુંવરજી બાવળીયાએ બેઠક બાદ સૂચક નિવેદન આપતા ગુજરાત ભાજપ અને સામાજિક રાજનીતિમાં ખીલેલા કમળમાં 'ચર્ચારૂપી વમળ'ને અવકાશ આપ્યો છે. બેઠક બાદ બાવળીયાને પૂછાયેલા એક પ્રશ્નના જવાબમાં તેઓએ કઈક એવું કહ્યું કે, ખુદ ભાજપના જ સદસ્યોને આશ્ચર્યનો પાર ના રહે.કુવરજી  બાવળીયાએ કહ્યું કે, 'જસદણની બેઠકની તમે ચિંતા ના કરો,હું જસદણથી ચૂંટણી લડી રહ્યો છુ'. 

કહેવાય છે કે, રૂપાણી સરકારમાં મંત્રી રહેલા બાવળીયા રાજ્યના નવા સરદાર,નવી સરકારની ટીમમાં સામેલ નહોતા. ત્યારથી સમયાંતરે કેટલાક નિવેદનોથી પાર્ટીમાં જ આંતરિક ચર્ચાઓ થતી કે, કુંવરજી નારાજ છે. હજુ હમણાં જ કેટલાક સામાજિક વિવાદોને લઈને બાવળીયા સમાજમાં વર્ચસની લડાઈમાં કેટલીક સ્પષ્ટતા માટે ગાંધીનગર આવ્યા હતા. હવે, બાવળીયાના દાવાનો દમ પણ સમય જ કહેશે. 

રાજકોટ કલેકટર કચેરીમાં ત્રણ મહિના બાદ આજે ફરિયાદ સમિતીની આજે બેઠક મળી હતી. આ બેઠકમાં પૂર્વ કેબિનેટ મંત્રી કુંવરજી બાવળીયાએ સૌથી વધુ પ્રશ્નો પુછ્યાં હતાં. જેમાં સૌથી વધુ સ્ટાફની ગેરહાજરીના પ્રશ્નો પૂછવામાં આવ્યાં હતાં. ઉલ્લેખનીય  છે કે, આ બેઠકમાં લલિત કગથરા, લલિત વસોયા અને મહમદ પીરજાદાએ બેઠકમાં ભાગ લીધો હતો. 

બેઠક બાદ કોંગ્રેસેના ધારાસભ્ય લલિત કગથરાનું નિવેદન

આ બેઠક બાદ કોંગ્રેસના ધારાસભ્યએ લલિત કગથકરાએ નિવેદન આપ્યું હતું કે,  આ બેઠકમાં કુંવરજી બાવળિયા વિરોધપક્ષના સભ્ય હોય તેમ પ્રશ્નો કર્યા હતાં. આ સાથે તેઓએ સૌથી વધુ સ્ટાફની ગેરહાજરીના પ્રશ્નો પૂછ્યા હતાં.તેમજ કુંવરજી બાળળિયાએ સૌથી વધુ 27 મુદ્દા ઉઠાવ્યા હતાં.  ધારાસભ્ય લલિત કગથરા સૂર્યોદય યોજનાને લઈને પ્રશ્ન પૂછયા હતાં.  

મંત્રી પદ ગયા બાદ બાવળિયા અસલી વિપક્ષી મૂડમાં 

ઉલ્લેખનીય છે કે, કુંવરજી બાવળિયાએ મંત્રીપદ ગયા બાદ હવે રાજકોટ જિલ્લા ફરિયાદ સમિતિ સમક્ષ પ્રશ્નોનો ખડકલો કરી દેતાં આગામી દિવસોમાં તડાફડી થવાના અણસાર મળી રહ્યાં છે. મહત્વનું છે કે, કુંવરજી બાવળિયાએ ગત બેઠકમાં ધડાધડ 60 થી વધુ પ્રશ્નો રજૂ કરી દીધા છે. તેમાં માર્ગ મકાન વિભાગ હસ્તકના ગેરંટી પિરિયડના માર્ગોને થયેલાં નુકસાન, ગામતળ નીમ કરીને ગરીબોને પ્લોટ ફાળવવામાં ઢીલ, બેરોજગારોને લોનમાં બેંકોની કનડગત, સરકારી દવાખાનામાં હડકવા વિરોધી ઈન્જેકશનોના ખૂટતા સ્ટોક, વીજ તંત્ર દ્વારા પેટા કચેરીની જમીન માટે નાણાં ફાળવવામાં બે વર્ષથી થતી ઢીલ વગેરે મુદ્દા સમાવિષ્ટ છે. કુંવરજી બાવળીયાએ  ચૂંટણી સામે આવતા તંત્ર પર બળાપો કાઢી રહ્યા હોવાનો અંદરખાને આરોપ પણ થઈ રહ્યો છે.