ક્રિકેટ સટ્ટા રેકેટ / અમદાવાદમાં 1800 કરોડનો સટ્ટો રમાયો: રેડમાં 500 ખાતા, 100 સીમ-મોબાઈલ, ઈન્ટરનેશનલ રેકેટનો થયો પર્દાફાશ

• ક્રિકેટ સટ્ટા રેકેટનો પર્દાફાશ
• સટ્ટો રમાડનારા 4 આરોપીની ધરપકડ
• 1,800થી વધુ રૂપિયાના વ્યવહાર મળ્યા

આગામી 31 માર્ચથી IPL 2023 શરૂ થવા જઈ રહી છે. ત્યારે આઈપીએલ ટૂર્નામેન્ટ પહેલા મેગાસિટી અમદાવાદમાં સૌથી મોટા સટ્ટા રેકેટનો પર્દાફાશ થયો છે. જેના કારણે સમગ્ર શહેરમાં ચકચાર મચી જવા પામી છે અને સમગ્ર મામલે પોલીસે કાયદેસરની કાર્યવાહી હાથ ધરી છે. 

દૂધેશ્વરની ખાનગી ઓફિસમાં દરોડો
અમદાવાદના દૂધેશ્વરમાં આવેલી એક ખાનગી ઓફિસમાં દરોડો પાડીને PCBની ટીમે સટ્ટો રમાડનારા 4 આરોપીઓની ધરપકડ કરી છે. તપાસમાં 1 હજાર 800 કરોડથી વધારેના રૂપિયાના વ્યવહાર મળી આવ્યા છે. આરોપીઓએ સટ્ટો રમાડવા અને બેંક એકાઉન્ટ મેનેજ કરવા આ ઓફિસ રાખી હોવાનું પણ સામે આવ્યું છે. 

ચાર આરોપીની ધરપકડ 
આ ઓફિસમાંથી ઈન્ટરનેશનલ એકાઉન્ટ મેનેજ કરાતું હોવાનું પણ સામે આવ્યું છે. PCBની તપાસમાં 500થી વધારે એકાઉન્ટ મળી આવ્યા છે. સાથે 100 જેટલા સિમકાર્ડ અને મોબાઈલ પણ મળી આવ્યા છે. IPl સટ્ટાકાંડમાં રેડ દરમિયાન નામચીન બુકીઓના ઓનલાઈન આઈડી મળી આવ્યા છે.  જેમા મહાદેવ બુક, ક્રિષ્ના રેડ્ડી બુકના સટ્ટા એકાઉન્ટ મળી આવ્યા છે. ડાયમંડ એક્સચ નામના અનેક ઓનલાઈન સટ્ટા મળી આવ્યા છે.  PCBની ટીમે સટ્ટાના પૈસા મેનેજમેન્ટ કરતા ચાર આરોપીની ધરપકડ કરી છે.  

સુરતમાં પણ થયો હતો સટ્ટા રેકેટનો પર્દાફાશ
આપને જણાવી દઈએ કે, આ મહિને જ સુરતમાંથી ઓનલાઈન સટ્ટો રમાડતા 11 આરોપીઓની ધરપકડ કરવામાં આવી હતી. સુરતના મોટા વરાછા ખાતે આવેલા તુલસી આર્કડમાં ઉતરાણ પોલીસે રેડ કરી ઓનલાઇન સટ્ટો રમી રૂપિયા ટ્રાન્સફર કરતા હોવાના કારસ્તાનનો પર્દાફાશ કર્યો હતો. આ દરમિયાન ઉતરાણ પોલીસે સટ્ટા રેકેટ ચલાવતા 11 આરોપીની ધરપકડ કરી હતી અને લાખોનો મુદ્દા માલ જપ્ત કરી કાયદેસરની કાર્યવાહી કરી હતો. 

11 આરોપીઓની કરાઈ હતી ધરપકડ
આ તપાસમાં સાયબર ક્રાઇમ પોલીસ પણ જોડાઈ હતી. આ તમામ યુવકો 15 જેટલી એપ્લિકશન્સની માધ્યમથી સટ્ટો રમતા હોય અને રમાડતા હોવાનું તપાસમાં બહાર આવ્યું હતું. આ દરમિયાન પોલીસે 15 જેટલા લેપટોપ, કોમ્પ્યુટર, મોબાઈલ પણ કબ્જે લીધા હતી. પોલીસએ 11ને આરોપીને ઝડપી મુખ્ય આરોપી દિલ્હીના અજયની શોધ ખોળ હાથ ધરી હતી.