કોરોના વાયરસ / લૉકડાઉનમાં અવ્વલ અમૂલ હવે કોરોના સામે લડવા માટે આવ્યુ મેદાને, શરૂ કરી આ પ્રોડક્ટ

• કોરોના સામેની લડાઈ માટે અમુલે શરૂ કરી નવી પ્રોડક્ટ
• હળદર, કેસર અને બદામ મિશ્રિત હલ્દી દૂધનું થશે વેચાણ 
• આદુ, તુલસી સહિતના મિશ્રિત પીણાંની શ્રેણી પણ કરશે લોન્ચ

દૂધના શોખીન અને અમૂલના ગ્રાહકો માટે ખુશ ખબર આવી છે. અમુલ દ્વારા હળદર, કેસર અને બદામ મિશ્રિત હલ્દી દૂધ(હળદરવાળું દૂધ)નું વેચાણ થશે. 200mlના રૂ.30 ભાવે અમૂલ હલ્દી દૂધનું વેચાણ કરવામાં આવશે. આ અંગે અમૂલ ડેરી જણાવવામાં આવ્યું છે કે, રોજની 2 લાખ પેક બનાવવાની ક્ષમતા છે. આદુ, તુલસી સહિતના મિશ્રિત પીણાંની શ્રેણી પણ લોન્ચ કરશે.

રોગપ્રતિકારક શક્તિ વધારવામાં મદદ રૂપ થશે હલ્દી દૂધઃ સોઢી

GCMMFના મેનેજિંગ ડિરેક્ટર આર. એસ. સોઢીએ જણાવ્યું હતું કે, ‘રોગપ્રતિકારક શક્તિ વધારવા માટે હળદર જાણીતી છે. બીમારીમાં ખાસ કરીને હળદરવાળું દૂધ પીવાનો ઉલ્લેખ આયુર્વેદમાં પણ કરાયો છે. હળદરવાળું દૂધ ફક્ત ભારતમાં જ નહીં વિશ્વમાં પણ Turmeric Latte તરીકે ઓળખાય છે. ઘરગથ્થુ સારવાર માટે પણ હળદરનું દૂધ જ વપરાય છે.

અમૂલ ડેરીએ એક પણ દિવસ દૂધની સપ્લાય રોકી નથી

હાલ કોરોના સામે માત્ર પોલીસ, તબીબો કે ઈમરજન્સી સેવાઓના કર્મચારીઓ જ નથી લડી રહ્યા. આ લોકડાઉનના સમયમાં દેશવાસીઓ જ્યારે ઘરમાં જ પુરાઈ રહ્યા છે ત્યારે તેમની સવારની ચા ન બગડે તેનું ધ્યાન આપણું ગુજરાત રાખી રહ્યું છે. હા આપણું ગુજરાત. દેશબંધીમાં બધુ જ બંધ છે અને અનેક વસ્તુઓ ખોરવાઈ ગઈ છે ત્યારે ગુજરાતની અમૂલ ડેરી એક પણ દિવસ દૂધની સપ્લાય રોકી નથી. અમુલના કર્મચારીઓએ સતત 24 કલાક કામ કરીને આ દેશને દૂધ પુરુ પાડ્યું છે.

ઘણી અફવાઓ લોકડાઉન સમયે ઉડી કે દૂધ નહીં મળે. તેના કારણે લોકોએ પહેલા તો પડાપડી કરી દૂધનો સ્ટોક કરી લીધો હતો. પણ આજે બધુ જ સામાન્ય થઈ ગયું છે. અને ક્યારેય દૂધનો સપ્લાય રોકાવાનો નથી. અને ન તો અમૂલની અન્ય કોઈ પ્રોડક્ટનો સપ્લાય. આ પુષ્ટી ખુદ અમૂલના મેનેજિંગ ડાયરેક્ટરે કરી હતી. ત્યારે હવે લોકડાઉન દરમિયાન અમુલે નવી પ્રોડક્ટ શરૂ કરવાની જાહેરાત કરી છે.