Unlock 2 / આવતીકાલથી અમદાવાદમાં એક્સપ્રેસ બસો દોડતી થશે, આવા સ્ટેશન પર નહીં રોકાય બસ

• આવતીકાલથી અમદાવાદથી એક્સપ્રેસ બસો શરૂ થશે
• કાલથી અમદાવાદથી 2325 એક્સપ્રેસ બસો શરૂ થશે
• આવતીકાલથી એક્સપ્રેસ બસ ઇન્ટરસ્ટેટ નહીં થાય શરૂ

1 જુલાઈથી અમદાવાદ તેમજ રાજ્યમાંથી 2325 એક્સપ્રેસ બસ સેવા શરૂ થશે. જેમાં રોજના 5 લાખ મુસાફરો લાભ લેશે. અત્યાર સુધી માત્ર 30 ટકા બસો ચાલુ હતી તે તાલુકાથી તાલુકામાં મુસાફરી કરતી હતી. પરંતું હવે એક્સપ્રેસ બસ સેવા શરૂ થતાની સાથે રાજ્યભરમાં બસો દોડતી થશે. મહત્વનું છે કે એક્સપ્રેસ બસ મુખ્ય સ્ટેશનથી મુખ્ય સ્ટેશન વચ્ચે ક્યાંય ઊભી રહેશે નહીં જે મોટો ડેપો હશે અને જ્યાં ટેમ્પરેચર ગનની વ્યવસ્થા હશે તેવા સ્ટેશન પર બસ રોકાશે. જેથી આવતીકાલથી રાજ્યમાં 2325 બસના પૈડાંઓ સવારથી જ રાજ્યના ધોરીમાર્ગો પર દોડતા થઈ જશે.

એક્સપ્રેસ બસ અન્ય રાજ્યમાં નહીં જાય

મહત્વનું છે કે એક્સપ્રેસ બસ સેવા ગુજરાત પૂરતી જ રહેશે અન્ય કોઈ રાજ્યમાં જશે નહીં. એક્સપ્રેસ માટે અત્યારથી જ ઓનલાઇન બુકિંગ પણ ચાલુ કરી દેવામાં આવ્યા છે સાથે સાથે તમામ બસ સ્ટેશન ઉપર સેનેટરાઈઝ તેમજ ટેમ્પરેચર ગનની પણ વ્યવસ્થા કરાઈ છે.

અનલૉક 2ની ગાઇડલાઇન

અનલૉક-2ની ગાઈડલાઈન જાહેર કરી દેવાઈ છે. કેન્દ્ર સરકારે નવી ગાઇડલાઇન જાહેર કરી છે જે મુજબ દેશભરમાં રાત્રે 10 વાગ્યાથી સવારે 5 વાગ્યા સુધી કર્ફ્યૂ રહેશે. 31 જૂલાઇ સુધી અનલોક-2 રહેશે. દેશભરમાં શાળા કોલેજો હજુ પણ 31 જૂલાઇ સુધી બંધ રહેશે. અનલૉક 2માં કન્ટેઇનમેન્ટ ઝોનમાં લૉકડાઉનનું કડકાઇથી પાલન કરાવામાં આવશે. ધાર્મિક અને રાજકીય કાર્યક્રમો બંધ રહેશે. મોલ, થિએટર, જીમ, ઓડિટોરિયમ, એન્ટરટેઇમેન્ટ પાર્ક પણ બંધ રહેશે. ડોમેસ્ટિક ફ્લાઇટ અને ટ્રેન મર્યાદિત સંખ્યામાં ચાલુ રહેશે. વંદે ભારત મિશન અંતર્ગત ઇન્ટરનેશનલ ફ્લાઇટ ચાલુ રહેશે. ત્યારે હવે ગુજરાતમાં 1 જુલાઈથી અમદાવાદ તેમજ રાજ્યમાં એક્સપ્રેસ બસ સેવા શરૂ થશે.