અમદાવાદ / અમરાઇવાડીમાં મકાન ધરાશાયી થવાનો મામલો, AMCની ટીમ ઘટનાસ્થળે, મૃત્યુઆંક 5 પર પહોંચ્યો

ગઇકાલે જેસીબી મશીન બંધ થઇ જતાં કામગીરી બંધ કરવામાં આવી હતી. જોકે હવે ફરી કાટમાળ હટાવવાની કામગીરી હાથ ધરાશે. પોલીસ અને કોર્પોરેશનની ટીમ દ્વારા આ કામગીરી શરૂ કરવામાં આવશે.

જો કે અમરાઇવાડીમાં મકાન ધરાશાયી થવાની ઘટનામાં અત્યાર સુધીમાં 5 લોકોનાં મોત નિપજ્યાં છે. અમરાઇવાડી વિસ્તારના બંગલાવાડી ચાલીમાં મકાન ધરાશાયી થયું હતું. જો કે હજુ પણ કેટલાંક લોકો કાટમાળમાં ફસાયા હોવાની આશંકા છે. 

અમદાવાદમાં અમરાઇવાડી વિસ્તારમાં 100 વર્ષ જૂની 3 માળની બિલ્ડીંગ ધરાશાયી થતાં અનેક લોકો દટાયા હતા. અમરાઇવાડી વિસ્તારના જનતાનગર ટોરેન્ટ પાવરની સામે 100 વર્ષ જૂની બિલ્ડીંગ એકાએક ધરાશાયી થઇ હતી. હાલમાં ફાયર વિભાગની 7 ટીમ દ્વારા રેસ્ક્યું ઓપરેશન હાથ ધર્યું હતું.

અમરાઇવાડી વિસ્તારની આ દુર્ઘટના ઘટનાસ્થળે હાજર ફાયર વિભાગની ટીમ દ્વારા રાહત અને બચાવ કામગીરી હાથ ધરાઇ હતી. જેમાં 5થી વધુ લોકોને બચાવી લેવાયા હતા. આ બિલ્ડીંગના કાટમાળમાંથી બહાર કઢાયેલા ઇજાગ્રસ્ત લોકોને એલજી હોસ્પિટલ ખસેડવામાં આવ્યા હતા.

રેસ્ક્યું ઓપરેશન અટકી પડ્યું હતું
અમદાવાદમાં અમરાઇવાડીમાં ધરાશાયી થયેલ મકાનના કાટમાળ નીચે છેલ્લી એક વ્યક્તિ દટાયેલ હતી. ત્યારે રેસ્ક્યું કામગીરી વચ્ચે કોર્પોરેશનનું JCB મશીન બંધ પડતા રેસ્ક્યુ અટક્યું હતું.

મુખ્યમંત્રી રૂપાણીએ દુઃખ વ્યક્ત કર્યું હતુ
અમરાઈવાડીમાં મકાન ધરાશાયી થવા મામલે મુખ્યમંત્રી વિજય રૂપાણીને દુ:ખ વ્યક્ત કર્યુ હતુ. સીએમ રૂપાણીએ ગઇકાલે જણાવ્યું હતું કે તંત્ર દ્વારા તાત્કાલિક બચાવ કામગીરી હાથ ધરવામાં આવી છે.