- અમદાવાદમાં પરિણીતાની લાજ લેવાની કોશિષ
- પતિ નાસ્તો લેવા માટે નીચે ગયો ત્યારે યુવક બારીમાંથી અંદર ઘુસ્યો
- પોલીસે આરોપીને દબોચી લઈ કાર્યવાહી હાથ ધરી
અમદાવાદ શહેરના નરોડા વિસ્તારમાં આવેલી હોટલના રુમમાં એક અજાણ્યા યુવકે ઘુસીને પરિણીતાની લાજ લેવાની કોશિષ કરી હોવાની ચોંકાવનારી ઘટના સામે આવી છે. પરિણીતાનો પતિ નાસ્તો લેવા માટે નીચે ગયો હતો ત્યારે યુવક બારીમાંથી અંદર આવ્યો હતો અને આ કૃત્યને અંજામ આપતા દેકારો બોલી ગયો હતો.
પરિણીતા ચોંકી ઉઠી હતી
સમગ્ર કેસની વાત કરવામાં આવે તો નરોડા વિસ્તારમાં રહેતા દંપતીને ઘરે ફર્નિચરનું કામ ચાલતું હોવાથી હોટલમાં રહેવું ભારે પડ્યું છે.છેલ્લા દોઢ મહિનાથી ઘરમાં ફર્નિચરનું કામ ચાલતુ હોવાથી તે નરોડા ટોલનાકા પાસે આવેલી પેરેડાઇઝ હોટલમાં રહે છે. તેવામાં મહિલા તેના પતિ સાથે હોટલના રુમમાં હાજર હતી ત્યારે રાતના સાડા ત્રણ વાગ્યાની આસપાસ તેને ભુખ લાગી હતી. બાદમાં મહિલા ટીવી જોઇ રહી હતી ત્યારે તેનો પતિ નીચે નાસ્તો લેવા માટે ગયો હતો ત્યારે પાર્થ નામના શખ્સ બારીમાંથી રુમમાં ઘુસી આવ્યો હતો. જેને પરિણીતાનો હાથ પકડી લીધો હતો. આથી પરિણીતા ચોંકી ઉઠી હતી અને બુમાબુમ કરતા હોટલનો સ્ટાફ અને તેનો પતિ આવી ગયો હતો.
ફરિયાદ દાખલ કરી આરોપીની ધરપકડ
ફરિયાદી મહિલાએ આરોપ સાથે જણાવ્યું કે તે ટીવી જોતી હતી ત્યારે પતિ નીચે ગયા હતા તે સમયે રૂમની બારીમાં અવાજ આવી રહ્યો હતો. જેથી તેણે ઉભા થઇને બારી પાસે ગઇ ત્યારે તેની એક શખ્સ ત્યા ઉભો હતો. બારીની છાજલી પાસે શખ્સને જોતા તેને પુછ્યુ હતું કે તમે કોણ છો. જેથી તે ઉશ્કેરાઈ ગયો હતો. અને બીભત્સ શબ્દો બોલી બીભત્સ માંગણીઓ કરવા લાગ્યો હતો. શખ્સ રુમમાં આવી ગયો હતો અને તેણે મહિલા નો હાથ પકડીને છેડતી કરવા લાગ્યો હતો જેથી તે ગભરાઇને રુમની બહાર નીકળી ગઇ હતી અને બુમાબુમ કરવા લાગી હતી. હોટલનો સ્ટાફ તેમજ પતિ આવી જતા શખ્સને ઝડપી લીધો હતો. સમગ્ર ઘટનાની જાણ પોલીસને કરતા પોલીસ એ ફરિયાદ દાખલ કરી આરોપીની ધરપકડ કરીને વધુ તપાસ શરૂ કરી છે.
