બેદરકારી / માતા-પિતા માટે સુરતનો લાલબત્તી સમાન કિસ્સો, રમતા-રમતા બાળકી ત્રીજા માળથી નીચે પટકાઈ અને..

• સુરતમાં 5 વર્ષની બાળકી ત્રીજા માળેથી પડતા મોત
• ત્રીજા માળની બાલ્કનીમાંથી બાળકી નીચે પટકાતા મોત
• પોલીસે સમગ્ર મામલે કાર્યવાહી હાથ ધરી

મળતી માહિતી મુજબ સુરતના પાંડેસરા વિસ્તારમાં ત્રીજા માળે રહેતા દંપતીની દિકરી સાંજના સમયે બાલ્કનીમાં રમી રહી હતી. તે દરમ્યાન અચાનક બાળકી બાલ્કનીમાંથી નીચે પટકાતા તેને ગંભીર ઈજાઓ પહોંચવા પામી હતી. ત્યારે બાળકીને તાત્કાલીક સારવાર અર્થે હોસ્પિટલ ખસેડવામાં આવી હતી. જ્યાં સારવાર દરમ્યાન બાળકીનું મોત નિપજવા પામ્યું હતું.

બાળકીને માથાના અને કપાળના ભાગે ગંભીર ઈજાઓ પહોંચી
પાંડેસરા વિસ્તારમાં ભગવતીનગર પાસે રહેતા દીપકકુમાર પ્રસાદની 5 વર્ષીય બાળકી અપ્રીતિ ઘરની ગેલરીમાં રમી રહી હતી. તે દરમ્યાન અચાનક તે નીચે પટકાતા તેને માથા તથા કપાળના ભાગે તેમજ હાથે ગંભીર ઈજાઓ પહોંચતા તેને તાત્કાલીક સારવાર અર્થે સિવિલ હોસ્પિટલ ખસેડવામાં આવી હતી.

ઘટનાને નજરે જોનાર શું કહે છે
સમગ્ર ઘટનાને નજરે જોનારા સ્થાનિક રહીશ વિકાસકુમારે જણાવ્યું હતું કે અમે અહીં નીચે બેઠા હતા. તે દરમિયાન અચાનક જ ઉપરથી બાળકી નીચે પટકાઈ જેથી અને સૌ પણ ગભરાઈ ગયા હતા. ત્યારે અમે તાત્કાલીક 108 મારફતે બાળકીને સારવાર અર્થે હોસ્પિટલ ખસેડી હતી. જ્યાં તેનું સારવાર દરમ્યાન મોત નિપજ્યું. પાંચ વર્ષીય બાળકીનું મોત નિપજતા લોકોમાં શોકનું મોજુ ફરી વળ્યું હતું. ત્યારે આ બાબતે પોલીસે ગુનો નોંધી આગળની કાર્યવાહિ હાથ ધરી છે.