મહીસાગરના બાલાસિનોરમાં ગમખ્વાર અક્સ્માત સર્જાતા લગ્ન પ્રસંગ માતમમાં ફેરવાયો છે. પૂરઝડપે આવતી સ્વિફ્ટ કારે વરઘોડામાં નાચતા મહેમાનોને અડફેટે લેતા 2 લોકોના મૃત્યુ નિપજ્યા છે, જ્યારે 25 લોકો ઈજાગ્રસ્ત થયા છે. ઈજાગ્રસ્તોને સારવાર અર્થે હોસ્પિટલમાં ખસેડવામાં આવ્યા છે. આ સમગ્ર ઘટનાના રૂંવાડા ઊભા કરી દે તેવા CCTV ફૂટેજ સામે આવ્યા છે.
લગ્નનો પ્રસંગ માતમમાં પરિવર્તિત
બાલાસિનોરમાં એક દુર્ઘટનાએ લગ્નના રૂડા પ્રસંગને મોતના માતમમાં પરિવર્તિત કરી દીધો હોવાની ઘટના સામે આવી છે. હાલ લગ્નસરાની સિઝન ચાલી રહી છે. ત્યારે મહીસાગર જિલ્લાના બાલાસિનોરમાં દેવી પૂજક પરિવારમાં લગ્ન પ્રસંગ હતો. જેથી ગઈકાલે રાત્રે વરરાજાનો વરઘોડો બાલાસિનોર શહેરમાં નીકળ્યો હતો.
મહેમાનોને લીધા અડફેટે
આ દરમિયાન શહેરના સેવાલિયા રોડ પર રિલાયન્સ પેટ્રોલ પંપ પાસે ફૂલ સ્પીડમાં આવતી સ્વિફ્ટ કારના ચાલકે વરઘોડામાં નાચતા મહેમાનોને અડફેટે લીધા હતા. આ અકસ્માતથી વરઘોડામાં અફરાતફરી મચી ગઇ હતી. અકસ્માત થવાના કારણે લગ્નના વરઘોડામાં આનંદની જગ્યાએ માતમ છવાઈ ગયો હતો.
25 લોકો ઈજાગ્રસ્ત થયા
આ અંગેની જાણ થતાં બાલાસિનોર પોલીસની ટીમ બનાવ સ્થળે દોડી આવી હતી. ઈજાગ્રસ્તોને 108 એમ્બ્યુલન્સમાં શહેરની કે.એમ.જી હોસ્પિટલમાં ખસેડવામાં આવ્યા હતા. આ દુર્ઘટનામાં 25 લોકો ઈજાગ્રસ્ત થયા છે, જ્યારે 2 લોકોના કરૂણ મોત નીપજ્યાં છે. આ અંગેની જાણ થતાં જિલ્લા પોલીસ વડા આર.બી બારોટ પણ હોસ્પિટલ ખાતે દોડી આવ્યા હતા.
