લાલબત્તી / નવસારી: પિતા ઊંઘતા હતા, માતા ઘરકામમાં હતી અને રમતા રમતા એક વર્ષીય બાળકી પડી ડોલમાં.! થયું દર્દનાક મોત

• માતા-પિતા માટે લાલબત્તી સમાન કિસ્સો
• નવસારીમાં ડોલમાં પડી જતા એક વર્ષીય બાળકીનું મોત
• રમતા સમયે બાળકી ડોલમાં પડી હતી

 નવસારીમાં માતા-પિતા માટે લાલબત્તી સમાન કિસ્સો પ્રકાસમાં આવ્યો છે. જેને લઈને સમગ્ર પંથકમાં ગમગીની ફેલાઈ છે. રમતા સમયે બાળકી ડોલમાં પડી હતી. બાદમાં એક વર્ષીય બાળકીનું મોત નીપજ્યું હતું.

ફૂલ જેવી બાળકી બાજુમાં રમતી હતી

માતા, પિતાની આંખ ઉઘાડનાર આ કિસ્સાની વિગત એવી છે કે નવસારી શહેરના જમાલપોરના નીલકંઠ અપાર્ટમેન્ટમાં રહી નેપાળી પરિવાર ગુજરાન ચલાવતો હતો. નેપાળી યુવાન વોચમેનનું કામ કરતો હતો. આ દરમિયાન વોચમેન પિતા સૂતા હતા અને માતા ઘરકામ કરવા ગઈ હતી. ત્યારે આ નેપાળી પરિવારની એક વર્ષીય ફૂલ જેવી બાળકી બાજુમાં રમતી હતી. આ પરિવારની એક વર્ષીય બાળા રમતા રમતા અકસ્માતે પાણી ભરેલી ડોલમાં પડી ગઈ હતી.

સંતાનને ગુમાવતા પરિવારમાં શોકનો માહોલ
જે અંગે જાણ થતા દેકારો બોલી ગયો હતો.  બાળકીના રડવાનો અવાજ સાંભળી પિતાએ બુમાબુમ કરતા લોકો દોડી આવ્યા હતા. બીજી બાજુ દીકરીને ડોલમાં જોતા લોકોના હોશ ઉડી ગયા હતા. તરત જ દીકરીને ડોલમાંથી બહાર કાઢી સારવાર માટે હોસ્પિટલ ખસેડવામાં આવી હતી.  જોકે સારવાર મળે તે પહેલા ખાનગી હોસ્પિટલમાં બાળાને લાવતા તબીબોએ તપાસીને તેને મૃત જાહેર કરી હતી. આ સમગ્ર ઘટનાને લઈને પોલીસ ઘટના સ્થળે દોડી ગઈ હતી.જ્યા તપાસ હાથ ધરી છે. બીજી તરફ પોતાના સંતાનને ગુમાવતા પરિવારમાં શોકનો માહોલ છવાયો છે.