દુર્ઘટના / વલસાડના ડુંગળી હાઈવે પર કારમાં અચાનક ભભૂકી ઉઠી આગ, ચાલક જીવતો ભૂંજાયો

• વલસાડ આગમાં સળગી ગયો યુવક
• વલસાડ પાસે નેશનલ હાઈ-વેની ઘટના
• ચાલુ કારમાં અચાનક લાગી આગ

ઉનાળાની શરૂઆત થતાં જ ચાલતી કારમાં આગ લાગવાના બનાવો પણ સામે આવી રહ્યા છે, ત્યારે આવો જ એક બનાવ આજે વલસાડમાં બન્યો છે. વલસાડમાં ફૂલ સ્પીડમાં જતી અર્ટિકા કારમાં અચાનક આગ ભભૂકી ઉઠી હતી. જેમાં એક યુવક અંદર જીવતો ભૂંજાઈ ગયો. 

અર્ટિકા કારમાં અચાનક લાગી આગ
મળતી માહિતી અનુસાર, વલસાડના ડુંગળી હાઈવે પર કબીર પંથ મંદિર પાસે અર્ટિકા કારમાં અચાનક આગ લાગી હતી. જે બાદ રાહદારીઓએ પાણીથી આગ પર કાબૂ મેળવવાના પ્રયાસો હાથ ધર્યા હતા. જોકે, તેમને સફળતા મળી નહોતી. તો આ મામલે એક રાહદારીએ ફાયર વિભાગને જાણ કરી હતી. 

યુવક કારમાં જીવતો ભૂંજાયો
ફાયર વિભાગે 2 કલાકની ભારે જહેમત બાદ આગ ઉપર કાબૂ મેળવ્યો હતો. જોકે, આગની ઘટનામાં કારમાં સવાર એક યુવકનું મોત થયું છે.  હાલ ડુંગરી પોલીસે યુવકના મૃતદેહને પીએમ અર્થે ખસેડીને વધુ તપાસ હાથ ધરી છે. જ્યારે આગ કયા કારણોસર લાગી તે હજી અકબંધ છે.