વિદેશનો ક્રેઝ / આ વર્ષે ગુજરાતમાં 7.70 લાખ પાસપોર્ટ ઇશ્યૂ કરાયા, સ્ટાફની અછત વચ્ચે પણ રજાના દિવસે કર્મચારીઓએ ફરજ બજાવી

• ગુજરાતીઓમાં વિદેશ જવાનો ક્રેજ વધ્યો
• આ વર્ષે રાજ્યમાં 7.70 લાખ પાસપોર્ટ ઈશ્યૂ થયા
• સ્ટાફની અછત વચ્ચે કર્મચારીઓએ રજાના દિવસે પણ કામ કર્યુ
• 8.12 લાખ અરજીઓમાંથી 7.70 લાખ અરજીનો નિકાલ કરાયો
• એપોઈન્મેન્ટના સમયમાં પણ ઘટાડો થયો

Passport News : ગુજરાતીઓમાં વિદેશ જવાનો ક્રેઝ વધ્યો હોવાનું સામે આવ્યું છે. વાત જાણે એમ છે કે, આ વર્ષે રાજ્યમાં 7.70 લાખ પાસપોર્ટ ઈશ્યૂ થયા છે. મહત્વનું છે કે, સ્ટાફની અછત વચ્ચે કર્મચારીઓએ રજાના દિવસે પણ કામ કર્યુ હતું. જેને લઈ અત્યાર સુધીમાં 8.12 લાખ અરજીઓમાંથી 7.70 લાખ અરજીનો નિકાલ કરાયો છે. આ સાથે એપોઈન્મેન્ટના સમયમાં પણ ઘટાડો થયો હોવાનું સામે આવ્યું છે.

ગુજરાતમાં લોકોનો વિદેશ ફરવા જવાનો ક્રેઝ સતત વધી રહ્યો છે. રાજ્યમાંથી લાખોની સંખ્યામાં વિદ્યાર્થીઓ પણ અભ્યાસ માટે વિદેશ જઈ રહ્યા છે. જેને લઈ પાસપોર્ટ ઓફિસમાં પાસપોર્ટ માટે થતી અરજીઓની સંખ્યામાં મોટો વધારો નોંધાયો છે. આંકડા પર નજર કરીએ તો આ વર્ષમાં નવેમ્બરના અંત સુધીમાં ગુજરાત RPO દ્વારા મળેલી 8.12 લાખ અરજીઓ પૈકી 7.70 લાખ અરજીઓના નિકાલ કરી પાસપોર્ટ તૈયાર કરી આપી દેવામાં આવ્યા છે.

સ્ટાફની અછત વચ્ચે કર્મચારીઓએ રજાના દિવસે પણ કામ કર્યુ 
વિગતો મુજબ સ્ટાફની અછત વચ્ચે કર્મચારીઓએ શનિવારે સરકારી રજા હોવા છતાં પાસપોર્ટ ઓફિસની કામગીરી ચાલુ રાખી અરજદારોની અરજીઓના નિકાલ કર્યા હતા. ગુજરાત RPO રેન મિશ્રાના જણાવ્યા મુજબ તમામ પાસપોર્ટ સહાયતા કેન્દ્રો અને પોસ્ટ ઓફિસ પાસપોર્ટ સહાયતા કેન્દ્રો પર દિવસે દિવસે ટ્રાન્સપોર્ટ માટેના અરજદારોની સંખ્યા વધી રહી છે. વર્તમાન પરિસ્થિતિમાં રોજના સાડા ત્રણ હજારથી વધુ અરજદારોની એપ્લિકેશન પર કામગીરી કરવામાં આવી રહી છે.