- વિધાનસભા ચૂંટણીને લઈ PAASના પૂર્વ કન્વીનર દિનેશ બાંભણિયાનું ટ્વીટ
- આગામી વિધાનસભા ચૂંટણીમાં PAAS ઉમેદવારો ઉતારશે
- PAASના 23 આગેવાન ઉમેદવારી કરશે તેવું ટ્વીટ
- દિનેશ બાંભણિયાએ કહ્યું ઉમેદવારની સંખ્યા વધી પણ શકે છે
ગુજરાતમાં વિધાનસભાની ચૂંટણી જેમ જેમ નજીક આવી રહી છે તેમ તેમ હવે દરેક પક્ષો અને સામાજિક સંસ્થાઓ હરકતમાં આવી રહી છે. તેવામાં પાટીદાર અનામત આંદોલન સમિતિને લઈ એક મોટા સમાચાર સામે આવ્યા છે. વિગતો મુજબ પાસના પૂર્વ કન્વીનર દિનેશ બાંભણિયાએ એક ટ્વિટ કરીને જણાવ્યું છે કે, વિધાનસભા ચૂંટણીમાં PAAS ઉમેદવારો ઉતારશે. જેને લઈ હવે ફરી એકવાર વિધાનસભા ચૂંટણી પૂર્વે PAAS દ્વારા ચૂંટણીમાં ઊતરવાની જાહેરાત કરાઇ છે.
રાજ્યમાં વિધાનસભા ચૂંટણી પહેલા દરેક રાજકીય પક્ષો અને સામાજિક સંસ્થાઓ હરકતમાં આવી ગઈ છે. પાટીદાર અનામત આંદોલન સમિતિ એટલે કે PAASના પૂર્વ કન્વીનર દિનેશ બાંભણિયાએ વિધાનસભા ચૂંટણીને લઈ એક મોટી જાહેરાત કરી છે. દિનેશ બાંભણિયાએ પોતાના ટ્વિટર આઈડી પરથી જણાવ્યું છે કે, વિધાનસભા ચૂંટણીમાં PAAS ઉમેદવારો ઉતારશે.
શું કહ્યું દિનેશ બાંભણિયાએ ?
દિનેશ બાંભણિયાએ પોતાના ટ્વિટર આઈડી પર લખ્યું છે કે,"ગુજરાત વિધાનસભા ૨૦૨૨ ચૂંટણી માં પાટિદાર અનામત આંદોલનના ૨૩ આગેવાનો ઉમેદવારી કરશે...સંખ્યા વધી પણ શકે છે ...હવે જામશે માહોલ"
ચૂંટણી પહેલા રાજકીય દિગ્ગજોના ગુજરાતમાં આંટાફેરા વધ્યા
રાજ્યમાં વિધાનસભા ચૂંટણી પહેલા હવે તમામ પક્ષોના રાજકીય દિગ્ગજોના ગુજરાતમાં આંટાફેરા શરૂ થયા છે. આજે દેશના વડાપ્રધાન નરેંદ્ર મોદી અને કેન્દ્રીય ગૃહમંત્રી અમિત શાહ વિકાસ કામોના લોકાર્પણને લઈ ગુજરાત પ્રવાસે છે. આ સાથે અગાઉ આમ આદમી પાર્ટીના અરવિંદ કેજરીવાલ પણ ગુજરાત આવી ચૂક્યા છે. આ સાથે આગામી દિવસોએ રાહુલ ગાંધી પણ ગુજરાત આવી શકે છે. તેવામાં હવે દરેક પાર્ટીના નેતાઓ ચૂંટણીને લઈ સક્રિય બન્યા છે.
