મહામારી / કોરોનાની ઘાતક લહેરને રોકવા માટે દેશમાં આટલા દિવસનું લૉકડાઉન તો કરવું જ પડશે : નિષ્ણાતો

• કોરોનાની બીજી લહેર અટકાવવાનો આવ્યો સૌથી મોટો ઉપાય
• ઓછામાં ઓછું 15 દિવસનું લોકડાઉન જરુરી
• લોકડાઉન નહીં લગાડાય તો પરિસ્થિતિ બેકાબૂ બનશે તેવી પૂરી સંભાવના 

ફોર્સિસ હોસ્પિટલના ક્લિનિકલ હેમેટોલોજી ડિપાર્ટમેન્ટના ડિરેક્ટર ડો.રાહુલ ભાર્ગવે જણાવ્યું કે હાલમાં કોરોનાના દર્દીઓથી હોસ્પિટલો ઠસોઠસ ભરાઈ ચૂકી છે અને લોકો ટપોટપ મરી રહ્યાં છે. કેટલાક ઠેકાણે અછતને કારણે રસીકરણ પણ અટકાવી દેવાયું છે. આ એક ઈમરજન્સી જેવી સ્થિતિ પેદા થઈ છે અને તેથી એક નેશનલ લોકડાઉનની જરુર છે. 

ઓછામાં ઓછા 15 દિવસના લોકડાઉનનની તાતી જરુર

ડો.ભાગર્વે જણાવ્યું કે આ રીતે આપણે કોરોનાની ઘાતક સાંકળને તોડી શકીશું અને વધારેમાં વધારે લોકોનું રસીકરણ કરી શકીશું. જો આપણે ટૂંકા ગાળાનું કોઈ લોકડાઉનનું આયોજન નહીં કરીએ તો હોસ્પિટલોમાં પગ મૂકવાની જગ્યા નહીં બચે. દર્દીઓને બેડ અને જરુરી સેવાઓ પણ નહી મળે. તેમણે કહ્યું કે આપણે ઓછામાં ઓછા 15 દિવસના લોકડાઉનની તો જરુર છે. જરુરી નથી કે 15 દિવસનું આ નવું લોકડાઉન ગયા વર્ષના લોકડાઉન જેટલું કડક હોય પરંતુ તેનો યોગ્ય રીતે અમલ કરાવવાની તાતી જરુર છે. 

અમરાવતીમાં સાત દિવસનું લોકડાઉન સફળ રહ્યું

બીજા કેટલાક નિષ્ણાંતોએ અમરાવતી લોકડાઉનનું પણ ઉદાહરણ આપ્યું. તેઓ જણાવી રહ્યાં છે જેવી રીતે કોરોનાની ઘાતક ચેઈનને તોડવા માટે અમરાવતીમાં સાત દિવસનું લોકડાઉન જાહેર કરાયું તેવું જ લોકડાઉન આખા દેશમાં લાગુ પાડવાની જરુર છે. 

સોશિયલ ડિસ્ટન્સિંગના નિયમોનું કડકાઈથી પાલન અત્યંત જરુરી 

મેદાંતા હોસ્પિટલના ચેપી રોગના નિષ્ણાંત ડોક્ટર નેહા ગુપ્તાએ જણાવ્યું કે હાલની કટોકટીની ઘડીએ સોશિયલ ડિસ્ટન્સિંગના નિયમોનું કડકાઈથી પાલન કરાવવાની જરુર છે જેને કારણએ ઓવરલોડ થયેલી હેલ્થકેર સેવાઓનું ભારણ ઘટાડવામાં મદદ મળશે. હોસ્પિટલોમાં બેડની અછત છે તે વાત પણ ધ્યાનમાં લેવી જોઈએ. 

પહેલી વાર દેશમાં રેકોર્ડ 1 લાખ 85 હજારથી વધારે કેસ આવ્યા 

ભારતમાં કોરોના સંક્રમણ બેકાબુ રફ્તાર ચાલુ છે. દેશમાં કોરોનાના દર્દીઓ અને મોતના આંકમાં સતત વધારો થઈ રહ્યો છે. પહેલી વાર દેશમાં રેકોર્ડ 1 લાખ 85 હજારથી વધારે કેસ આવ્યા છે. ભારતમાં કોરોનાના એક્ટિવ મામલા હવે 13 લાખને પાર થઈ ગયા છે. ઉલ્લેખનીય છે કે કેટલાક દિવસોમાં દેશમાં સતત દોઢ લાખથી વધારે કોરોનાના પોઝિટિવ કેસ આવ્યા છે.

24 કલાકમાં 1.85 લાખથી વધારે નવા કેસ આવ્યા

વર્લ્ડોમીટર અનુસાર ગત 24 કલાકમાં 1.85 લાખથી વધારે નવા કેસ આવ્યા બાદ સંક્રમિતોની કુલ સંખ્યા 1.38 કરોડને પાર પહોંચી ગઈ છે. જ્યારે 1 હજારથી વધારે મોત થતા કુલ મોતનો આંક 1, 72, 115 થઈ ગઈ છે. ગત દિવસોમાં સતત પોઝિટિવ આવનારા મામલાની સાથે કોરોનાથી સાજા થનારાના દરમાં ઘટાડો થયો છે.કોરોના પર કાબુ મેળવવા માટે મહારાષ્ટ્રમાં આજ રાત 8 વાગ્યાથી કડક નિયમો લાગૂ થશે. મહારાષ્ટ્રમાં બ્રેક ધ ચેન નામનુ અભિયાન હેઠળ 15 દિવસ સુધી કલમ 144 લાગૂ રહેશે. આ દરમિયાન ફક્ત જરુરી સેવાઓ માટે ઘરની બહાર નિકળી શકશો.