- તમિલનાડુના કાંચીપુરમમાં બસ ડ્રાઈવરે ક્ષમતા કરતા વધારે મુસાફરો બસમાં ભર્યાં
- જગ્યા ન મળતા સ્કૂલના છોકરાઓએ બસના દરવાજાએ લટકવું પડ્યું
- બ્રેક લાગતા એક છોકરો દરવાજા બહાર ફંગોળાઈને રોડ પર પડ્યો
- સદનસીબે બચી ગયો
તમિલનાડુના કાંચીપુરમમાં એક બસ ડ્રાઈવરની ઘોર બેદરકારી સામે આવી છે. ક્ષમતા કરતા પણ વધારે મુસાફરોને બેસાડીને ડ્રાઈવર બસ લઈને રવાના થયો હતો. બસમાં કેટલાક સ્કૂલના છોકરાઓ પણ જઈ રહ્યાં હતા પરંતુ બસમાં પગ મૂકાય તેટલી પણ જગ્યા ન હોવાથી છોકરા દરવાજાએ લટકી રહ્યાં હતા. હવે બ્રેક વાગતા બસમાં મોટો ઝટકો લાગ્યો હતો અને આને કારણે દરવાજાએ લટકી રહેલા છોકરાઓમાંથી એક ફંગોળાઈને રોડ પર પડ્યો હતો. આ જોઈને બસમાં રાડારાડ મચી હતી અને ડ્રાઈવરે તાત્કાલિક બસ થોભાવી દીધી હતી. સદનસીબે છોકરાને કંઈ થયું નહોતું. પડ્યા બાદ તે આઘાતમાં લાગતો હતો પરંતુ જીવ બચી ગયાનો આનંદ પણ તેના ચહેરા પણ જણાતો હતો.
5 લાખ લોકોએ જોયો વાયરલ વીડિયો
શેર થયા બાદથી આ વીડિયો અનેક સોશિયલ મીડિયા પ્લેટફોર્મ પર સામે આવ્યો છે. ટ્વિટર પર તેને 4,88,000થી વધુ વ્યૂઝ મળી ચૂક્યા છે.આ ક્લિપ પર પ્રતિક્રિયા આપતા એક યુઝરે લખ્યું, "માય ગોડ!! આનાથી અમારા શાળાના દિવસોની ભયાનક યાદો આવી. 3-4 દાયકા પછી પણ આવી વસ્તુઓ ચાલુ રહે છે તે જોઈને ડરામણી છે !!" બીજાએ કહ્યું, "તે ખૂબ જ નસીબદાર છે કે તે પૈડા નીચે ન પડ્યો. ત્રીજાએ ઉમેર્યું હતું કે, "સલામત સવારીનો અર્થ એ છે કે બાળકોએ બસની અંદર જવું જોઈએ નહીં, એક હાથે લટકતી અને મોટું વજન વહન કરતી બસના પગથિયા પર સવારી ન કરવી જોઈએ. ચોથા યુઝરે લખ્યું કે જો આપણે અમારા બાળકોને શાળાએ જવા માટે સલામત સવારી પ્રદાન કરી શકતા નથી, તો અમારી પાસે જે વિકાસ થયો છે તે કંઈ જ નથી.
યુપીમાં પણ ડ્રાઈવરે રિક્ષાના છાપરા પર બેસાડીને બાળકોને સ્કૂલે લઈ ગયો હતો
ઉલ્લેખનીય છે કે યુપીમાં પણ આવી જ એક ઘટના સામે આવી હતી જેમાં એક ડ્રાઈવરે રિક્ષાના છાપરા પર બેસાડીને કેટલાક છોકરાઓને સ્કૂલે લઈ જતો જોવા મળ્યો હતો. પોલીસે આ કેસમાં રિક્ષાવાળા સામે કાયદેસરની કાર્યવાહી કરી હતી.
