- પ્રયાગરાજમાં ગંગામાં નાવ પર યુવાનોએ કરી પાર્ટી
- 8 યુવાનોએ હુક્કાના કસ માર્યાં
- નાવ પર સગડી મૂકીને ચિકન પણ પકવ્યું
- વીડિયો વાયરલ થયા લોકો ભડક્યા, પોલીસ એક્શનમાં
યુપીના પ્રયાગરાજમાં ગંગા નદીમાં બોટ પર યુવાનોએ કરેલા કામને લઈને લોકોમાં ભારે રોષની લાગણી પ્રવર્તી રહી છે. સંગમનગરી પ્રયાગરાજમાં કેટલાક યુવાનો નાવ લઈને પાર્ટી કરવા નીકળ્યાં હતા. યુવાનોએ બોટ પર હુક્કા અને ચિકન પાર્ટી કરી હતી. આ ઘટનાનો એક વીડિયો પણ વાયરલ થયો હતો. વાયરલ વીડિયોમાં જોઈ શકાતું હતું કે ગંગા નદી પર એક બોટ જઈ રહી છે અને તેમાં કેટલાક યુવાનો બેઠેલા હતા. ત્રણ-ચાર યુવાનો બોટ પર પડેલા હુક્કામાંથી ટેસમાંથી કસ ખેંચી રહ્યાં હતા. તો બાકીના બેઠા બેઠા મસ્તી કરતા હતા. બોટ પર એક મોટી સગડી પણ પડેલી જોવા મળતી હતી. સગડી પર કશુંક શેકાઈ રહ્યું હોવાનું જણાતું હતું. જરા ધ્યાનથી જોતા સગડી પર મોટા મોટા અંગારામાં ચિકન શેકાઈ રહ્યાંનું માલૂમ પડતું હતું. બીજા એક યુવાને આ ઘટનાનો વીડિયો શૂટ કરીને સોશિયલ મીડિયા પર મૂક્યો હતો જે આંખના પલકારમાં વાયરલ થઈ જતા લોકો ભડક્યાં હતા અને પોલીસ પણ એક્શનમાં આવી હતી.
વીડિયો જોયા બાદ લોકોમાં જબરદસ્ત ગુસ્સો
સોશિયલ મીડિયા પર આ વીડિયો વાયરલ થયા બાદ લોકોમાં જબરદસ્ત ગુસ્સો જોવા મળી રહ્યો છે, લોકોનું કહેવું છે કે આ ખૂબ જ શરમજનક કૃત્ય છે, એક યૂઝરે વીડિયો શેર કરીને લખ્યું છે કે, ગંગા ગંદી થઈ રહી છે, એક તરફ લોકો પૂરથી પરેશાન છે, તો બીજી તરફ કેટલાક લોકો એવા પણ છે જે પૂરમાં કૂલ છે અને બોટમાં બેસીને હુક્કા-મીટ વગેરે ખાઈ રહ્યા છે.
પોલીસ તપાસનો ધમધમાટ
આ ઘટનાને લઈને લોકમાં પ્રવર્તી રહેલા ભારે રોષને કારણે પોલીસ પણ હરકતમાં આવી છે અને તાબડતોબ તેની તપાસ શરુ કરી દીધી છે. પોલીસે આરોપીઓની સામે કડક કાર્યવાહી કરવાની પણ ખાતરી આપી છે.
