- ઓવરટેક કરવાની લ્હાયમાં વધુ એક ગંભીર અકસ્માત
- વડોદરાનાં કપુરાઇ બ્રિજ નેશનલ હાઇવે પર અકસ્માત
- બસ ટ્રેલર સાથે અથડાતા 4નાં મોત, 15 લોકો ઇજાગ્રસ્ત
વડોદરાનાં કપુરાઇ બ્રિજ નેશનલ હાઇવે પર રાજસ્થાન ભીલવાડાથી મુંબઈ જતી બસનો ટ્રેલર સાથે ગંભીર અકસ્માત સર્જાયો છે. જેમાં 4 મુસાફરોના સ્થળ પર જ મૃત્યુ થયા છે જ્યારે 15 મુસાફરો ગંભીર રીતે ઘાયલ થયા છે. ઓવરટેક કરતી વેળાએ ઘઉં ભરેલા ટ્રેલર સાથે બસનો ગંભીર અકસ્માત સર્જાયો છે.
ઇજાગ્રસ્તોને બસના પતરા કાપીને બહાર કઢાયા
જોકે આ અકસ્માત બાદ ટ્રેલરચાલક સ્થળ પરથી ફરાર થઇ ગયો હતો. આ ટ્રેલરમાં ઘઉં ભર્યા હતા. હાલમાં આ અકસ્માતમાં ઇજાગ્રસ્તોને સારવાર અર્થે સયાજી હોસ્પિટલમાં ખસેડવામાં આવ્યા છે. હાઇવે પર રફ ડ્રાઇવિંગ કરતા બસ ચાલકો અંગે વારંવાર ફરિયાદ થઇ છે. આ અકસ્માતમાં બસના પતરા કાપીને ઇજાગ્રસ્તોને બહાર કાઢવામાં આવ્યા છે. જોકે તેના પરથી જ ખ્યાલ આવી જશે કે બસ કેટલી સ્પીડમાં હશે અને તે ટ્રક સાથે પણ કેવી ધડાકાભેર અથડાઇ હશે. જેના કારણે બસનો કુચડો બોલી ગયો હતો.
ઓવરટેક કરવાની લ્હાયમાં મુસાફરોએ જીવ ખોવવાનો વારો આવ્યો
તમને જણાવી દઇએ કે, આ અકસ્માત વહેલી સવારે થયો છે. ઓવરટેક કરવાની લ્હાયમાં મુસાફરોએ જીવ ખોવવાનો વારો આવ્યો છે. ડ્રાઇવરની એક ભૂલના કારણે ડ્રાઇવર સહિત 4 લોકોને ઘટનાસ્થળે જ કાળ ભરખી ગયો. જ્યારે 15 લોકો તો હજુ પણ જીવન-મરણ વચ્ચે ઝોલાં ખાઇ રહ્યાં છે.
મહત્વનું છે કે, હાઇવે પર રફ ડ્રાઇવિંગ કરતા બસ ચાલકો અંગે અનેક વાર ફરિયાદ કરવામાં આવી છે. છતાં હજુ સુધી આ મામલે કોઈ પગલાં નથી લેવાતા. ત્યારે એકવાર ફરી વડોદરાનાં કપુરાઇ બ્રિજ નેશનલ હાઇવે પર બેફામ બસચાલકના ડ્રાઇવિંગના કારણે હાઈવે પર અનેક વાહનચાલકો બેફાન વાહનો હંકારતા હોય છે જેને પગલે આવા અકસ્માતો સર્જાતા રહે છે.
