માવઠું / ગુજરાતમાં ફરી વરસાદી વિધ્ન! આ બે જિલ્લામાં ધોધમાર વરસ્યો, હજુ 24 કલાક ભારે માવઠાની આગાહી

• વડોદરાના ડભોઇમાં કમોસમી વરસાદ શરુ થયો
• કમોસમી વરસાદ શરુ થતાં ઠંડીમાં થયો વધારો
• કપાસ અને તુવેરના પાકને નુક્સાનની ભીતિ

રાજ્યમાં હવામાન વિભાગની આગાહીના પગલે કમોસમી વરસાદ ખાબક્યો છે. નર્મદાના રાજપીપળામાં કમોસમી વરસાદ રૂપી મુસીબત વરસી છે, તો બીજી તરફ વડોદરા જિલ્લાના ડભોઇમાં કમોસમી વરસાદ ખાબક્યો છે. કમોસમી વરસાદના પગલે ખેડૂતોના જીવ પડીકે બંધાયા છે

રાજપીપળામાં કમોસમી વરસાદ
નર્મદા જિલ્લાના રાજપીપળામાં કમોસમી વરસાદ વરસ્યો છે, જેના પગલે ખેડૂતોને ચિંતા વધી છે, અચાનક વાતાવરણમાં પલટો આવ્યો હતો. ત્યારબાદ વરસાદ વરસ્યો હતો. કપાસ અને તુવેરના પાકને નુક્સાનની ભીતિ સેવાઈ રહી છે. સતત અડધો કલાક વરસાદ પડતા ચોમાસાનો માહોલ સર્જાયો છે. 

ડભોઇમાં કમોસમી વરસાદ
વડોદરા જિલ્લાના ડભોઇમાં કમોસમી વરસાદ શરુ થયો છે. કમોસમી વરસાદનું આગમન થતા ઠંડીમાં વધારો થયો છે. હવામાન વિભાગની આગાહીને પગલે વરસાદ વરસ્યો છે. ખેડૂતોના કપાસ, દિવેલા, તુવેર જેવા પાકોમાં નુકસાનની ભિતી સેવાઈ રહી છે.

વાંચવા જેવું: ગુજરાત પર ફરી સંકટના વાદળ! આગામી 24 કલાકમાં જ રાજ્યના આ વિસ્તારો પર મેઘરાજા વરસશે

આગામી 24 કલાકમાં રાજ્યમાં હળવા વરસાદની આગાહી
આ બાબતે હવામાન વિભાગનાં અભિમન્યુ ચૌહાણે જણાવ્યું હતું કે, આગામી પાંચ દિવસ દરમ્યાન વાતાવરણની વાત કરીએ તો , આગામી 24 કલાકમાં ગુજરાતનાં અમુક વિસ્તારોમાં કમોસમી વરસાદ પડી શકે છે. જેમાં સાઉથ ગુજરાત તેમજ સૌરાષ્ટ્રનાં અમુક વિસ્તારમાં છૂટો છવાયો વરસાદ પડી શકે છે.  તે બાદનાં 24 કલાકની વાત કરીએ તો વાતાવરણ સૂકું રહેશે. જીલ્લાની વાત કરીએ તો નર્મદા,  સુરત, તાપી, નવસારી, ડાંગ, વલસાડ, દમણ-દાદરા નગર હવેલી, સૌરાષ્ટ્ર, ભાવનગરમાં છૂટો છવાયો વરસાદ પડી શકે છે.