બેદરકારી / ગુજરાતની આ સ્કૂલમાં એકસાથે 20 બાળકોની તબિયત લથડતાં વાલીઓ રોષે ભરાયા, ધારાસભ્ય પણ દોડ્યા

• આણંદની જોડ પ્રાથમિક શાળામાં મધ્યાહન ભોજન બાદ બાળકોની લથડી તબિયત 
• 20 બાળકોની તબિયત લથડતા તંત્ર થયું દોડતું
• ધારાસભ્ય યોગેશ પટેલ પણ પહોંચ્યા ઘટનાસ્થળે

આણંદની જોડ પ્રાથમિક શાળામાં ચોંકાવનારી ઘટના સામે આવતા ચકચાર મચી જવા પામી છે. જેમાં મધ્યાહન ભોજન આરોગ્યા બાદ અનેક બાળકોની તબિયત લથડતા દેકારો બોલી ગયો હતો. બીજી તરફ આ ગંભીર બેદરકારીને પગલે વાલીઓમાં રોષની જ્વાળા ભભૂકી હતી. વધુમાં આ મામલે સ્થાનિક ધારાસભ્ય યોગેશ પટેલને જાણ થતા તેઓ પણ તાબડતોબ ઘટનાસ્થળે દોડી ગયા હતા અને સ્થિતિનો તાગ મેળવ્યો હતો.

મધ્યાહન ભોજન જમ્યા બાદ બાળકોની તબિયત ખરાબ થઈ

આણંદ જિલ્લાની જોડ પ્રાથમિક શાળામાં એકી સાથે 20 બાળકોની તબિયત લથડી હતી. જે અંગેના વાવડ વહેતા થતા તંત્ર પણ દોડતું થતું હતું અને સંબંધિત વિભાગના અધિકારીકારીઓ અને ગામના આગેવાનો સ્કુલ ખાતે પહોંચ્યા હતા. જ્યા પૂછપરછ હાથ ધરતા મધ્યાહન ભોજન જમ્યા બાદ બાળકોની તબિયત ખરાબ થઈ હોવાનું સામે આવ્યું હતું. આ દરમિયાન બાળકોને મધ્યાહન ભોજનમાં પાપડીનો લોટ અપાયો હોવાનું સામે આવ્યું હતું. ત્યારબાદ ભોજનને લઇને આરોગ્ય ખાતાએ અને વહીવટી તંત્રએ સેમ્પલ લેવા સહિતની તપાસ હાથ ધરી હતી.

ધારાસભ્ય યોગેશ પટેલ પણ ઘટનાસ્થળે પહોચ્યા

બીજી તરફ વિદ્યાર્થીની તબિયત લથડતા વાલીઓએ શાળાનો ઘેરાવો કરીને આકરા સૂત્રોચ્ચાર થકી રોષ ઠાલવ્યો હતો. જેથી સ્થિતિને કાબુ કરવા સ્થાનિક પોલીસ પણ શાળાએ દોડી ગઇ હતી. જ્યા પોલીસ દ્વારા સ્થિતિ પર કાબુ મેળવવામાં આવ્યો હતો. આ સાથે ધારાસભ્ય યોગેશ પટેલ પણ ઘટનાસ્થળે પહોચ્યા હતા.

સળગતા સવાલ !

• મધ્યાહન ભોજનથી ફૂડ પોઈઝનિંગના બનાવો અવાર-નવાર સામે આવવુ કારણ શું ?
• મધ્યાહન ભોજનની યોજનામાં ગુણવત્તાયુક્ત આહાર કેમ અપાતો નથી ?
• મધ્યાહન ભોજનમાં સડેલુ અનાજ કેમ પહોંચાડાયા છે?
• મધ્યાહન ભોજનમાં ગુણવત્તાયુક્ત અનાજ કેમ અપાતુ નથી ?
• બાળકોને આપવાપાત્ર સારૂ અનાજ કોણ ખાઈ જાય છે ?
• સરકારી શાળામાં અભ્યાસ કરતા બાળકોના સ્વાસ્થ્ય સાથે કેમ ચેડા કરાઈ રહ્યા છે ?
• મધ્યાહન ભોજનમાં ગરીબ બાળકો જમે છે એટલે આ પ્રકારની બેદરકારીઓ થતી રહે છે ?
• આ પ્રકારના બનાવોમાં અન્ન અને નાગરિક પુરવઠા વિભાગની કોઈ જવાબદારી નથી ?