- હાલના સમયમાં બોલિવૂડમાં એકતાનો અભાવ છે - સુનીલ શેટ્ટી
- એવું લાગે છે કે બોલિવૂડનો અવાજ ખોવાઈ ગયો છે
- સુનીલ શેટ્ટીને અન્નાનું બિરુદ સંજય દત્તે આપ્યું હતું
સુનીલ શેટ્ટી કોઈને કોઈ કારણોસર ચર્ચાનો વિષય રહે છે એવામાં હાલ તેઓ અને સંજય દત્ત ટૂંક સમયમાં 'સ્ટાર વર્સિસ ફૂડ સર્વાઇવલ'ના પહેલા એપિસોડમાં જોવા મળશે. જેને શેફ રણવીર બ્રાર હોસ્ટ કરશે અને પહેલો એપિસોડ 9 ઓક્ટોબરે રિલીઝ થશે.સુનીલ શેટ્ટીએ તાજેતરમાં જ આ શો અંગે પોતાનો અનુભવ શેર કર્યો હતો અને તેની સાથે સુનીલ શેટ્ટી એ બોલિવૂડ અને એક્ટર્સ બોન્ડ વિશે ઘણા ખુલાસા કર્યા હતા.
હાલના સમયમાં બોલિવૂડમાં એકતાનો અભાવ છે
સુનીલ શેટ્ટીએ એક વાતચિત દરમિયાન કહ્યું હતું કે, 'હવે વસ્તુઓ પહેલા જેવી નથી રહી. બોલિવૂડમાં એકતાનો અભાવ છે. એવું લાગે છે કે બોલિવૂડનો અવાજ ખોવાઈ ગયો છે. જે પ્રકારનું બોન્ડિંગ લોકો પહેલા સેટ પર શેર કરતા હતા તે હવે સેટ પર જોવા મળતું નથી. '
સુનીલ શેટ્ટીને અન્નાનું બિરુદ સંજય દત્તે આપ્યું હતું
સુનીલ શેટ્ટી 'સ્ટાર વર્સીસ ફૂડ સર્વાઇવલ' શોમાં સંજય દત્ત સાથે જોવા મળશે. આ દરમિયાન સુનીલ શેટ્ટીએ શોમાં સંજય સાથેની તેની મિત્રતા અને ફિટનેસ સહિત અનેક મુદ્દાઓ પર વાત કરી હતી. સંજય દત્ત સાથેની મિત્રતા વિશે વાત કરતાં સુનીલ શેટ્ટીએ કહ્યું, 'ખૂબ ઓછા લોકો જાણે છે કે અન્નાનું બિરુદ મને સંજય દત્તે આપ્યું હતું. જ્યારે અમે 'કાંટે'નું શૂટિંગ કરતા હતા ત્યારે મારો સ્ટાફ મને અન્ના મારા મોટા ભાઈ તરીકે બોલાવતો હતો. આ પછી સંજય દત્તે પણ આવું કહેવાનું શરૂ કર્યું. મને યાદ છે કે 9/11 ની ઘટના ઘટી ત્યારે અમે લોસ એન્જલસમાં ઉતર્યા હતા. અમારે યુનિટ પાસે જ રહેવાનું હતું. બહાર જવાની જરૂર નહોતી. તે ખૂબ જ મુશ્કેલ સમય હતો. અમને અલગ રીતે જોવામાં આવતા હતા અને તે ખૂબ જ વિચિત્ર હતું. પરંતુ ત્યારે અમે સાથે રહ્યા અને એકબીજાની તાકાત બની ગયા.'
બોલીવુડમાં હવે પેહલા જેવું બોન્ડ જોવા નથી મળતું
સુનીલ શેટ્ટીએ આગળ કહ્યું, 'મને યાદ છે કે કેવી રીતે અમે સાથે મળીને ફૂડ શેર કર્યું અને ઘણી યાદો બનાવી. આ પ્રકારનું બંધન ખૂબ જ ખાસ છે. અમે એકબીજાના જીવનનો હિસ્સો બની ગયા છીએ અને તે મિત્રતા હજુ પણ ચાલુ છે. ' અભિનેતાએ આગળ કહ્યું, 'પહેલા સ્ટાર્સ શૂટિંગ દરમિયાન બ્રેક દરમિયાન એકબીજા સાથે સમય વિતાવતા હતા. વાતો કરતા હતા. પરંતુ, આજના સમયમાં લોકો શૂટિંગ પછી તરત જ પોતાની વેનિટી વેનમાં જાય છે. આ જ કારણ છે કે હવે પેહલા જેવું બોન્ડ જોવા નથી મળી રહ્યું.'
સુનીલ શેટ્ટીએ વધુમાં કહ્યું કે, 'આજે ઈન્ડસ્ટ્રીનો અવાજ ખોવાઈ ગયો છે. હવે પહેલા જેવી એકતા નથી. બધું નબળું પડી ગયું છે. હવે કોઈ કોઈનો બચાવ કરતું નથી. પરંતુ હવે લાગે છે કે જૂના દિવસો પાછા આવી રહ્યા છે. અમે બધાએ સાથે મળીને હેશટેગ્સ અને બૉયકોટ ટ્રેન્ડ પસાર કર્યો ત્યારથી મને લાગે છે કે જૂનો સમયની જેમ હવે દરેક વ્યક્તિએ અન્ય લોકો સાથે ઊભા રહેવું જોઈએ.'
