ગુજરાત પોલીસ પ્રત્યાર્પણ માટેના પૂરાવા રજૂ ન કરી શકતા કુખ્યાત બુટલેગર વીજુ સિંધીનું વોરન્ટ રદ થયું છે. દુબઈ સરકારે વીજુ સિંધીને છોડી મુક્યો છે.
Share
વડોદરાના કુખ્યાત બુટલેગર વીજુ સિંધીનું વોરન્ટ રદ
પૂરાવા રજૂ ન થતા દુબઈ સરકારે વીજુ સિંધીને છોડી મુક્યો
ગત વર્ષે એપ્રિલ મહિનામાં દુબઈ ગયો હતો વીજુ સિંધી
ગુજરાતમાં છેલ્લા બે દાયકાથી દારૂનો વેપાર કરનાર વડોદરાના કુખ્યાત બુટલેગર વીજુ સિંધીને લઈને મોટા સમાચાર સામે આવ્યા છે. દુબઈ સરકારે વડોદરાના કુખ્યાત બુટલેગર વીજુ સિંધીનું વોરન્ટ રદ કર્યું છે. ગુજરાત પોલીસ પ્રત્યાર્પણ માટેના પૂરાવા રજૂ ન કરી શકતા વોરન્ટ રદ કરવામાં આવ્યું છે. સાથે જ દુબઈ સરકારે કુખ્યાત બુટલેગર વીજુ સિંધીને છોડી મૂક્યો છે. દુબઈ સરકારે પોલીસને વોરન્ટ રદ કરવા સાથે બોન્ડની રકમ અને પાસપોર્ટ પરત કરવાનો આદેશ આપ્યો છે.
કોણ છે વીજુ સિંધી?
સમગ્ર ગુજરાતમાં કરોડોનો દારૂનું નેટવર્ક ચલાવનાર વિનોદ સિંધી ઉર્ફે વિજુ સિંધી સામે અનેક ગુના નોંધાયેલા છે. વિનોદ સિંધી ઉર્ફે વીજુ સિંધી આખા ગુજરાતમાં દારૂની ડિલિવરી કરે છે. જેમાં સૌરાષ્ટ્ર અને ગુજરાતની અલગ-અલગ જગ્યાએ કઈ રીતે દારૂ સપ્લાય કરવો, કઈ ગાડીમાં ક્યાં જીપીએસ લગાવવું, પોલીસથી કઈ રીતે બચવું તેમજ ક્યાં, કોને કેટલા પૈસા આપવા એ તમામ વિગતો અગાઉથી જ નક્કી હોય છે.
વીજુ સિંધી
ગયા વર્ષે એપ્રિલમાં ભાગી ગયો હતો દુબઈ
વીજુ સિંધી દરેક ગાડી કે જેમાં દારૂ ભર્યો હોય છે એનું સતત મોનિટરિંગ કરવા માટે એના વિસ્તારમાં આવતા અલગ-અલગ લોકોને કામ સોંપતો હતો. જેના આધારે દારૂની ડિલિવરી થાય ત્યાર બાદ જ આંગડિયાથી રૂપિયા કે હવાલાથી રૂપિયા મેળવવા માટે રીતસરની વ્યવસ્થા ગોઠવી રાખતો. ભૂતકાળમાં હરિયાણા, રાજસ્થાન સહિતના રાજ્યોમાંથી ગુજરાતમાં કરોડોનો દારૂ ઠાલવનાર વીજુ સિંધી ગત વર્ષે એપ્રિલ મહિનામાં દુબઇ ભાગી ગયો હતો. SMCએ વીજુ સિંધી વિરુદ્ધ રેડ કોર્નર નોટિસ જાહેર કરી હતી. ઇતિહાસમાં પહેલી વખત કોઈ બુટલેગર સામે રેડ કોર્નર નોટિસ ઈસ્યુ જાહેર કરાઇ હતી.
રેડ કોર્નર નોટિસના આધારે કરાઈ હતી ધરપકડ
રેડ કોર્નર નોટિસના આધારે દુબઈ પોલીસે UAEમાં સર્ચ કર્યું હતું. સર્ચ ઑપરેશન બાદ વીજુ સિંધીની ધરપકડ કરવામાં આવી હતી. વીજુ સિંધીને દુબઈથી અબુ ધાબી ઇન્ટરપોલના હેડક્વાર્ટર લઈ જવાયો હતો. આ અંગે UAE સુરક્ષા એજન્સીએ ભારતીય દૂતાવાસને ધરપકડની માહિતી આપી હતી. તમને જણાવી દઇએ કે, વીજુ સિંધી પર ગુજરાતમાં 60થી વધુ દારૂના કેસ નોંધાયા છે. જોકે, હવે તેને દુબઈ પોલીસ દ્વારા છોડી દેવામાં આવ્યો છે.
જાણો રેડ કોર્નર નોટિસ એટલે શું?
રેડ કોર્નર નોટિસ રીઢા ગુનેગારોને લઈને જાહેર કરવામાં આવે છે. આ નોટિસ અન્ય દેશોની તપાસ એજન્સીઓ અને પોલીસને ગુનેગાર બાબતે સૂચિત કરે છે. આવું એટલા માટે કારણ કે કોઈપણ ગુનેગાર પોલીસ અને તપાસ એજન્સીઓથી બચવાના પ્રયત્નમાં બીજા દેશમાં જઈને રહી શકે છે. બધા દેશોની એજન્સીઓ એવા ગુનેગાર બાબતે એલર્ટ જાહેર કરી શકે છે અને તેને પકડવામાં મદદ મળી શકે છે.
