દેશની સૌથી મોટી કાર ઉત્પાદક કંપની મારુતિ સુઝુકીની બે પ્રખ્યાત હેચબેક કાર બલેનો અને વેગન આરમાં મોટી ટેકનિકલ ખામીઓ સામે આવી છે. જેના કારણે કંપનીએ આ બંને કારને રિકોલ કરવાની જાહેરાત કરી છે. કંપનીએ આ બંને કારના લગભગ 16,041 યુનિટ ટેકનિકલ ખામીઓને દૂર કરવા માટે પાછા મંગાવ્યા છે.
મારુતિ સુઝુકીએ આજે વાહનોના 16,041 યુનિટ પાછા બોલાવ્યા છે. મારુતિ બલેનોના કુલ 11,851 યુનિટ અને મારુતિ વેગન આરના 4190 યુનિટ આ રિકોલમાં સામેલ છે. કંપનીનું કહેવું છે કે જુલાઈ અને નવેમ્બર 2019 વચ્ચે ઉત્પાદિત આ બંને મોડલમાં ટેકનિકલ સમસ્યાઓ જોવા મળી છે.
કારમાં શું ખામી છે ?
મારુતિ સુઝુકીનું કહેવું છે કે આ રિકોલથી પ્રભાવિત કારમાં ફ્યુઅલ પંપની મોટરમાં કેટલીક ખામી હોવાની શક્યતા છે. જેના કારણે આ કારોનું એન્જિન ચાલતી વખતે બંધ થઈ શકે છે અથવા એન્જિન ચાલુ કરવામાં મુશ્કેલી આવી શકે છે. તેથી, કોઈપણ સમસ્યાને ટાળવા માટે, આ મોડેલોના ગ્રાહકોએ તરત જ તેમની નજીકની ડીલરશીપનો સંપર્ક કરવો જોઈએ.
ગ્રાહકોએ શું કરવાનું છે?
જો તમે પણ મારુતિ સુઝુકી બલેનો અને વેગનઆરના માલિક છો તો તમારે ચિંતા કરવાની જરૂર નથી. કંપનીનું કહેવું છે કે રિકોલથી અસરગ્રસ્ત વાહન માલિકોનો મારુતિ સુઝુકી ડીલરશિપ દ્વારા સીધો સંપર્ક કરવામાં આવશે. આ માટે તેમને કૉલ, મેસેજ અથવા ઈ-મેલ મોકલવામાં આવી શકે છે. આ સિવાય ગ્રાહકો કંપનીની ઓફિશિયલ વેબસાઈટ પર જઈને તપાસ કરી શકે છે કે તેમની કાર આ રિકોલનો ભાગ છે કે નહીં.
આ માટે ગ્રાહકોએ આપેલી આ લિંક પર ક્લિક કરવાનું રહેશે. આ તમને કંપનીના સત્તાવાર પૃષ્ઠ પર લઈ જશે. જ્યાં 'Click Here' ટેબ પર ક્લિક કરો, ત્યારબાદ તમારે તમારા વાહનનો 14 અંકનો ચેસીસ નંબર દાખલ કરવો પડશે. ચેસિસ નંબર દાખલ કર્યા પછી, તમને પોપ-અપ મેસેજ દ્વારા ખબર પડશે કે તમારી કાર આ રિકોલનો ભાગ છે કે નહીં.
સમારકામ મફત હશે
અમે તમને જણાવી દઈએ કે, જો તમારી કાર આ રિકોલનો એક ભાગ છે, તો કંપની દ્વારા તમારી કારની મફતમાં તપાસ કરવામાં આવશે અને જો જરૂરી હોય તો, કારના પાર્ટ્સ મફતમાં બદલવામાં આવશે. આ માટે ગ્રાહકે કોઈ ફી ચૂકવવાની રહેશે નહીં
