ચંદ્રયાન પર નવું / સુરતના શખ્સનો હેરાનીભર્યો દાવો, 'વિક્રમ લેન્ડર મેં બનાવ્યું, મારે કારણે સફળ રહ્યું, શું કહ્યું પોલીસે?

• સુરતના શખ્સનો હેરાનીભર્યો દાવો
• મારે કારણે ચંદ્રયાન-3 સફળ રહ્યું
• વિક્રમ લેન્ડર મેં બનાવ્યું છે
• પોલીસને શખ્સનો દાવો લાગ્યો પોકળ 

એક તરફ ભારતીયો હાલ ચંદ્રયાન-3 મિશનની સફળતાનો જશ્ન મનાવી રહ્યા છે. તો બીજી તરફ ગુજરાતના સુરતના એક વ્યક્તિએ આવો દાવો કર્યો છે, જેના કારણે હોબાળો મચી ગયો છે. વાસ્તવમાં એક વ્યક્તિએ દાવો કર્યો છે કે તે ઈસરોના વૈજ્ઞાનિક છે અને તેના કારણે ભારતનું મૂન મિશન સફળ રહ્યું છે. એટલું જ નહીં તેમણે ચંદ્રયાનના લેન્ડરને ડિઝાઈન કરવાનો પણ દાવો કર્યો છે. પોલીસનું કહેવું છે કે, પ્રથમ દ્રષ્ટિએ આ દાવાઓ ખોટા છે.

પોલીસ કમિશનરે આપ્યો તપાસનો આદેશ 
સુરત પોલીસ શખ્સના દાવાની તપાસમાં લાગી છે કે શું તે ખરેખર ભારતીય અંતરિક્ષ અનુસંધાન સંગઠન (ઈસરો)માં કામ કરતો વૈજ્ઞાનિક હતો અને તેણે ચંદ્રયાન-3 મિશનનું લેન્ડર મોડ્યુલ ડિઝાઈન કર્યું હતું. ડેપ્યુટી કમિશનર ઓફ પોલીસ (સ્પેશિયલ બ્રાન્ચ) હેતલ પટેલે જણાવ્યું હતું કે, શહેર પોલીસ કમિશનર અજય તોમરે ક્રાઇમ બ્રાન્ચને પ્રથમ દર્શનીય રીતે ખોટા દાવાઓની ચકાસણી કરવા તપાસનો આદેશ આપ્યો છે.

મીડિયામાં શું દાવો કર્યો શખ્સે 
ડીસીપી પટેલે જણાવ્યું હતું કે ગુરુવારે વિક્રમ લેન્ડર સફળતાપૂર્વક ચંદ્ર પર ઉતર્યું ત્યારથી સ્થાનિક મીડિયાને ઇન્ટરવ્યુ આપી રહેલા મિતુલ ત્રિવેદી ઇસરોના વૈજ્ઞાનિક હોવાના તેમના દાવાને સમર્થન આપવા માટે કોઈ દસ્તાવેજો અથવા પુરાવા આપી શક્યા નથી. પીએચડી કરવાનો દાવો કરનારા ત્રિવેદીએ ગુરુવારે અનેક મીડિયા આઉટલેટ્સ અને ન્યૂઝ ચેનલોને જણાવ્યું હતું કે, તેમણે ચંદ્રયાન-3નું લેન્ડર ડિઝાઇન કર્યું છે. તે ચંદ્રયાન-2નો ભાગ હોવાથી ઇસરોએ તેને ચંદ્રયાન-3 મિશન પર પણ કામ કરવા માટે આમંત્રણ આપ્યું હતું. ત્રિવેદીએ દાવો કર્યો હતો કે તેણે લેન્ડરની મૂળ ડિઝાઇનમાં ઘણા ફેરફાર કર્યા છે. જેના કારણે તે ચંદ્રના દક્ષિણ ધ્રુવ પર સફળતાપૂર્વક ઉતરાણ કરવામાં સફળ રહ્યું હતું. તેણે ઈસરોની બેંગલુરુ ઓફિસમાં ચંદ્રયાન -3 ની ડિઝાઇન પર અને નાસામાં કામ કર્યું 
હોવાનો પણ દાવો કર્યો છે. 

પોલીસનું શું કહેવું છે 
જોકે આ ઘટનામાં સુરત પોલીસનું કહેવું છે કે શખ્સનો દાવો ખોટો છે તે ઈસરોના વૈજ્ઞાનિક નથી. ક્રાઈમ બ્રાન્ચ દ્વારા વધુ તપાસ કરવામાં આવશે અને જો તે ખોટું બોલતો જણાશે તો તેની સામે એફઆઈઆર દાખલ કરવામાં આવશે.  

વૈજ્ઞાનિક હોવાના કોઈ પુરાવા નથી
શખ્સના દાવા બાદ કેટલાક સ્થાનિક અખબારોએ ત્રિવેદીના દાવાની સચ્ચાઈ પર સવાલ ઉઠાવતા અહેવાલો પ્રકાશિત કર્યા હતા. "ત્રિવેદીને તેમના દાવાઓ સાબિત કરવા માટે દસ્તાવેજો સાથે ઓફિસમાં આવવાનું કહેવામાં આવ્યું હતું. જોકે તે તેના દાવાના ટેકામાં કોઈ દસ્તાવેજો અથવા પુરાવા રજૂ કરી શક્યો નથી. પોલીસ તપાસમાં એવું પણ જાણવા મળ્યું છે કે ત્રિવેદી B.Com ગ્રેજ્યુએટ ડિગ્રી ધારક છે.