- ફિલ્મ જોયા પછી ભૂતપૂર્વ ઓપનરે સોશિયલ મીડિયા પર આપી પ્રતિક્રિયા
- બોલિવૂડની વિવાદાસ્પદ ફિલ્મ 'આદિપુરુષ' પર ટ્વિટ કર્યું
- સેહવાગ દ્વારા કરવામાં આવેલ આ ટ્વીટ વિવાદ સર્જી શકે છે
Adipurush controversial tweet: ભારતીય ક્રિકેટ ટીમના પૂર્વ ઓપનર વીરેન્દ્ર સેહવાગ સોશિયલ મીડિયા પર ખૂબ જ એક્ટિવ રહે છે. પોતાના ટ્વીટના કારણે તે ઘણી ચર્ચામાં રહે છે. હાલમાં બોલિવૂડ ફિલ્મ આદિપુરુષને લઈને ઘણો વિવાદ ચાલી રહ્યો છે. હવે આ કડીમાં સેહવાગનું નામ પણ જોડાઈ ગયું છે. ફિલ્મ જોયા પછી ભૂતપૂર્વ ઓપનરે સોશિયલ મીડિયા પર તેની પ્રતિક્રિયા આપતા કંઈક લખ્યું જે ફિલ્મ નિર્માતાઓને ખૂંચી શકે છે.
ટીમ ઈન્ડિયાનો પૂર્વ વિસ્ફોટક ઓપનર વીરેન્દ્ર સેહવાગ સતત પોતાના મજેદાર ટ્વિટ્સને કારણે ચર્ચામાં રહે છે. રવિવારે પણ તેણે બોલિવૂડની વિવાદાસ્પદ ફિલ્મ 'આદિપુરુષ' પર ટ્વિટ કર્યું હતું, જે જોતા જ વાયરલ થઈ ગયું છે. આદિપુરુષ ફિલ્મ રામાયણ પર આધારિત છે જેમાં વિવાદાસ્પદ સંવાદને કારણે વિવાદ ઉભો થયો છે. ફિલ્મમાં પ્રભાસે રામનું પાત્ર ભજવ્યું છે જ્યારે અભિનેત્રી કૃતિ સેનન સીતા માતાનું પાત્ર ભજવી રહી છે.
વીરેન્દ્ર સેહવાગે આદિપુરુષ ફિલ્મને લઈને એક કટાક્ષ કરતુ ટ્વીટ કર્યા હતા. તેણે તેને પ્રભાસની અગાઉની સુપર ડુપર હિટ ફિલ્મ બાહુબલી સાથે જોડી દીધી છે. તેણે ટ્વીટમાં લખ્યું, "આદિપુરુષને જોયા પછી મને ખબર પડી કે કટપ્પાએ બાહુબલીને શા માટે માર્યો હતો." આ પોસ્ટની સાથે તેણે હસતા ઈમોજીનો પણ ઉપયોગ કર્યો છે.
સેહવાગ દ્વારા કરવામાં આવેલ આ ટ્વીટ વિવાદ સર્જી શકે છે. વિવાદાસ્પદ ડાયલોગના કારણે તેના પર ઘણી જગ્યાએ પ્રતિબંધ મુકવામાં આવ્યો છે. જેના કારણે ફિલ્મ મેકર્સને ઘણું નુકસાન થઈ રહ્યું છે. આ ફિલ્મ 600 કરોડમાં બની છે અને પહેલા અઠવાડિયામાં સારું કલેક્શન કર્યા બાદ આ ફિલ્મ ઊંધા મોઢે ધોવાઇ ગઈ છે. હવે સેહવાગ જેવી મોટી હસ્તી આવી ફિલ્મ વિશે લખે તો તેને વધુ નુકસાન થઈ શકે છે.
