- સુરત ,ગાંધીનગર બાદ હવે વડોદરામાં દુષ્કર્મ
- સગીરા સાથે દુષ્કર્મ કરનાર શખ્સની ધરપકડ
- પોલીસે અપહરણ-દુષ્કર્મ સાથે લગાવ્યો પોસ્કો
છેલ્લા એક સપ્તાહમાં ગુજરાતમાં નાની બાળકીઓ અને સગીરા સાથે દુષ્કર્મનાં બનાવો વધતા ચાલ્યા છે.સુરતના એક કેસમાં તો તત્કાલ નિકાલની જેમ એક નરાધમને 'અંતિમ શ્વાસ'સુધી જેલની કેદની સજા સંભળાવાઈ હતી.તો ગાંધીનગરના સાંતેજ-ખાત્રજ કેસમાં પણ પોલીસે એક મનો વિકૃત શખ્સની ધરપકડ કરી લીધી છે અને તેના પર પણ કાર્યવાહી થઇ રહી છે. આટલું ઓછું હોય તેમ હવે વડોદરામાં સગીરા સાથે દુષ્કર્મનો બનાવ સામે આવ્યો છે.વડોદરાના યુવકે 12 વર્ષની સગીરાને પહેલા પોતાની પ્રેમજાળમાં ફસાવી અને ત્યારબાદ સગીરાનું અપહરણ કરી નરાધમે માસુમ સગીરાની જિંદગી પીંખી નાખવાની ઘટનાએ ચકચાર મચાવી છે.
અપહરણ કરી લઇ ગયો પંચમહાલ
મહિલાઓ માટે સુરક્ષિત માનવામાં આવતું ગુજરાત હવે મહિલાઓ માટે સુરક્ષિત રહ્યું નથી રાજ્ય ના વિવિધ શહેરો માં એક બાદ એક દુષ્કર્મના કિસ્સા સામે આવી રહ્યા છે ત્યારે સંસ્કારી નગરી વડોદરા ના ડભોઇ રોડ ખાતે ગણેશ નગર માં રહેતી 12 વર્ષ ની સગીર કિશોરી ને તેના જ વિસ્તારમાં રહેતો નરાધમ જયેશ ઉર્ફે સંજય માળી એ પોતાની પ્રેમ જાળમાં ફસાવી ફરવા લઇ જવાના બહાને સગીરાનું અપહરણ કર્યું હતું. અપહરણ કર્યા બાદ સગીરાને પંચમહાલના બાકરોલમાં પોતાના મિત્રના ઘરે સગીરાને ગોંધી રાખી કિશોરી પર વારંવાર દુષ્કર્મ આચર્યું હોવાનો કિસ્સો સામે આવ્યો છે.
પરિવાર પર આભ તૂટ્યું
સગીરા નરાધમ જયેશ ઉર્ફે સંજય માળીની ચુંગાલમાંથી છૂટી ઘરે પરત ફરતા પરિવાર દ્ધારા સગીરાની પુછપરછ કરતા સગીરાએ આપવીતી જણાવતા,પરિવારના પગ તળેથી જમીન સરકી ગઈ હતી. સમગ્ર હકીકતની જાણ થયા બાદ પરિવારે પાણીગેટ પોલીસ મથકે જયેશ ઉર્ફે સંજય માળી વિરુદ્ધ ફરિયાદ દાખલ કરાવી હતી.
આરોપી પર પોસ્કો
વડોદરાના પાણીગેટ પોલીસે અપહરણ, દુષ્કર્મ સાથે પોસ્કોની કલમ લગાવી ગુનો નોંધી ફરાર થઇ ગયેલા નરાધમ જયેશ ઉર્ફે સંજય માળીની ગણતરીના જ કલાકો માં ધરપકડ કરી લીધી હતી અને આરોપીએ કોની મદદ લીધી હતી અને અન્ય બાબતોની પૂછપરછ કરવા આરોપીના રિમાન્ડ મેળવા ની તજવીજ હાથ ધરી છે..
