કામ ચાલુ / અમદાવાદમાં એલિસબ્રિજ પોલીસ સ્ટેશનથી દાણાપીઠ તરફની લેનમાં હાથ ધરાયું રિપેરિંગ

• એલસિબ્રિજનું રિપેરિંગ કામ
• બે મહિના સુધી ચાલશે કામ 
• સમયાંતરે એક પછી એક બ્રિજના કામ 

મહાનગર પાલિકાના વહીવટી તંત્રના સત્તાવાળાઓ દ્વારા સાબરમતી નદી પરના નવા એલસિબ્રિજનું રિપેરિંગ કામ હાથ ધરાયું છે, જે લગભગ બે મહિના સુધી ચાલશે.તંત્ર દ્વારા સૌથી પહેલાં ગત ઓગસ્ટ-2019માં સુભાષબ્રિજનું રિપેરિંગ હાથ ધરાયું હતું. ગત વર્ષની દિવાળી બાદ સુભાષબ્રિજને સતત 20 દિવસ બંધ પણ રખાયો હતો. સુભાષબ્રિજ બાદ નહેરુબ્રિજને રિપેરિંગ માટે ગત તા.13માર્ચથી 20 એપ્રિલ, 2021 સુધી બંધ રખાયો હતો. નહેરુબ્રિજની કામગીરી વધુ પડકારજનક હોઈ તેને 45 દિવસ સુધી બંધ રખાયો હતો.

ત્યાર બાદ સત્તાધીશોએ ગાંધીબ્રિજનું રિપેરિંગ કામ હાથ પર લીધું હતું અને તે સવા બે મહિના ચાલ્યું હતું. ગાંધીબ્રિજ બાદ સરદારબ્રિજના રિપેરિંગ પાછળ રૂ. 80 લાખ ખર્ચાયા હતા. હવે નવા એલસિબ્રિજનું રિપેરિંગ હાથ પર લેવાયું છે.

આ માટે પહેલાં એલસિબ્રિજ પોલીસ સ્ટેશનથી દાણાપીઠ મ્યુનિ. મુખ્યાલય તરફ જતી લેનના નદી તરફના પાંચ મીટરના પટ્ટા પર રિપેરિંગ કામ હાથ ધરાયું છે. અગાઉના સરદારબ્રિજના રિપેરિંગ વખતે એએમટીએસ અને એસટીની અવરજવર બંધ રખાતાં પેસેન્જર્સ ભારે મુશ્કેલીમાં મુકાયા હતા એટલે તંત્ર દ્વારા જે તે લેનને પૂરેપૂરી બંધ રાખવાના બદલે 10 મીટર પહોળી લેનના પાંચ મીટરના પટ્ટા પર રિપેરિંગ ચાલુ રાખીને બંને તરફના ટ્રાફિકની અવરજવર ચાલુ રખાઈ છે.

નવા એલસિબ્રિજના રિપેરિંગ પાછળ આશરે રૂ. 80 લાખ ખર્ચાશે અને તેમાં બંને લેનના 15-15 એક્સ્પાન્શન જોઇન્ટને રિપેર કરાશે.