- રાજકોટના ધોરાજીમાં હનીટ્રેપનો મામલો
- ધોરાજી પોલીસે 4 શખ્સોને ઝડપ્યા
- ફરિયાદી પાસેથી અલગ સમયે 4 લાખ રૂપિયા પડાવ્યા હતા
રાજ્યમાં હનીટ્રેપના કિસ્સા નોંધપાત્ર રીતે વધી રહ્યા છે. ત્યારે રાજકોટના ધોરાજીમાં મહિલાએ ફોન પર ફરિયાદીને ફોસલાવીને 4 લાખ રૂપિયા ખંખેર્યા હતા જે મામલે ચાર આરોપીને ઝડપી પાડવામાં આવ્યા છે. ધોરાજી પોલીસે હાલમાં ચારેય આરોપીઓને ઝડપી પાડીને તપાસનો ધમધમાટ શરુ કર્યો છે.
શું બન્યો હતો બનાવ ?
રાજકોટના ધોરાજીમાં એક મહિલાએ ફોન પર વાતો કરીને ફરિયાદીને ફસાવ્યો હતો. મહિલાએ ચોકીથી અકાળા ગામ સુધી મુકી જવા ફરિયાદીને કહ્યું હતું. જે દરમિયાન રસ્તામાં અરવિંદ ગજેરા નામના શખ્સે પોલીસ હોવાની ઓળખ આપીને તેને રોક્યો હતો . આ દરમિયાન અન્ય બે શખ્સો પણ ત્યાં પહોંચી ગયા. આમ ચારેય જણા ફરિયાદીને ગીર જંગલમાં લઇ ગયા જ્યાં ફરિયાદીને ધાક ધમકી આપીને પૈસાની માંગણી કરી હતી. આરોપીઓએ ફરિયાદી પાસેથી અલગ સમયે 4 લાખ રૂપિયા પડાવ્યા હતા.
ચાર આરોપીઓને ઝડપી પાડ્યા
ધોરાજીમાં હનીટ્રેપમાં ફસાવી લાખોનો તોડ કરનાર ટોળી સામે ગુનો દાખલ થયા બાદ પોલીસે આ ટોળીનાં આરોપીઓને દબોચી લઇ તપાસનો ધમધમાટ શરુ કર્યો છે. આ અંગે મળતી વિગતો એવા પ્રકારની છે કે ધોરાજીના નવા બસ સ્ટેન્ડ પાસે રહેતા એક વ્યક્તિને રાજકોટની જીન્નત ઉર્ફે બિલીબેન અલારખાભાઈ શેરવાડીયા,પરબત ભીખા કુવાડીયા, ભરત ડાયા પારઘી તેમજ અરવિંદ આંબા ગજેરા સહિતનાંએ ખેડૂતને હનીટ્રેપમાં ફસાવી નાણા ખંખેર્યા હતા. આ અંગે ધોરાજી પોલીસમાં ફરિયાદ થતા પોલીસે આઈપીસી કલમ 365-384-386-120 મુજબ ગુનો નોંધ્યો હતો. આ બનાવમાં પોલીસે તપાસના ચક્રો ગતિમાન કરી આરોપીઓને દબોચી લીધા છે અને વિશેષ તપાસ પીઆઈ એ.બી.ગોહેલ કરી રહ્યા છે.
સિક્યુરિટી એજન્સીના સંચાલકને હનીટ્રેપમાં ફસાવ્યો
રાજકોટમાં 14 માર્ચના રોજ હનીટ્રેપની વધુ એક ઘટના બની હતી. જેમાં સિક્યુરિટી એજન્સીના સંચાલકને હનીટ્રેપમાં ફસાવી રૂપિયાની માંગણી કરવામાં આવી હતી.ફોન પર ફ્રેન્ડ બનાવાનું કહી મહિલાએ વ્યક્તિને એકાંત માણવા બોલાવ્યો હતો. ત્યારે બાઇક પર જતા ત્રણ શખ્સોએ વ્યક્તિને રોક્યો અને મારી બહેનને ક્યાં લઇ જાય છે તેમ કહી તેનું અપહરણ કરી લીધું હતું, ત્રણ શખ્સોએ અવાવરૂ જગ્યાએ લઈ જઈને ખંડણી માંગી હતી. જો કે આ મામલે પોલીસ દ્વારા રૂપિયા માંગનાર બે આરોપીઓને ઝડપી પાડવામાં આવ્યા હતા. જ્યારે મહિલા સહિત બે શખ્સોને ઝડપી પાડવા તપાસના ચક્રોગતિમાન કર્યા હતા.
