- ધારાસભ્ય પ્રિયંક ખડગેને ચૂંટણી પંચની નોટિસ
- વડાપ્રધાન નરેન્દ્ર મોદી વિરુદ્ધ અપમાનજનક ટિપ્પણી કરવા બદલ નોટિસ
- પ્રિયંક ખડગેએ પીએમ મોદી માટે 'નાલાયક' શબ્દ વાપર્યો હતો
કોંગ્રેસના રાષ્ટ્રીય અધ્યક્ષ મલ્લિકાર્જુન ખડગેના પુત્ર અને ધારાસભ્ય પ્રિયંક ખડગેને ચૂંટણી પંચે નોટિસ ફટકારી છે.વડાપ્રધાન નરેન્દ્ર મોદી વિરુદ્ધ અપમાનજનક ટિપ્પણી કરવા બદલ ચૂંટણી પંચે નોટિસ ફાટકારતા ચર્ચા જાગી છે. આ મામલે કર્ણાટકના ચિત્તપુર વિધાનસભા મતવિસ્તારના કોંગ્રેસના ધારાસભ્ય પ્રિયંક ખડગે બરાબરના ફસાયા છે. નોંધનીય છે કે એક નિવેદન દરમિયાન પ્રિયંક ખડગેએ પીએમ મોદી માટે 'નાલાયક' શબ્દ વાપર્યો હતો. ત્યારબાદ વિરોધનો સુર ઉઠ્યો હતો.
આવતીકાલ સુધીમાં જવાબ આપવા નોટિસ
કેન્દ્રીય ચૂંટણી આયોગે પ્રિયંક ખડગેને વડાપ્રધાન નરેન્દ્ર મોદી માટે કરેલા શબ્દનો ખુલાસો કરતી નોટિસમાં પૂછ્યું હતું કે આ નિવેદન માટે તેમની સામે કાર્યવાહી કેમ ન કરવી જોઈએ? આ નોટિસ અંગે પ્રિયંક ખડગેને આવતીકાલે એટલે કે ગુરુવારે (4 મે) સાંજે 5 વાગ્યા સુધીમાં જવાબ આપવા માટે ચૂંટણી પંચે કહ્યું છે. અશોભનીય નિવેદન બાદ ભાજપે પ્રિયંકા વિરુદ્ધ ચૂંટણી પંચમાં ફરિયાદ કરી હતી.
ભાજપના ધારાસભ્યને પણ ECIની નોટિસ
ચૂંટણી આયોગે ભાજપના ધારાસભ્ય બસનાગૌડા આર પાટીલને પણ સોનિયા ગાંધી વિરુદ્ધ આપત્તિજનક ભાષાનો ઉપયોગ કરવા બદલ નોટિસ ફટકારી હતી. બસનાગૌડા ભાજપના સ્ટાર પ્રચારક છે. નોંધનીય છે કે કોંગ્રેસ અધ્યક્ષ મલ્લિકાર્જુન ખડગેએ ચૂંટણી રેલી દરમિયાન પિતાના ભાષણમાં પીએમ મોદી માટે 'ઝેરી સાપ' એવા શબ્દનો ઉપયોગ કર્યો હતો. આ બાદ બસનાગૌડાએ સોનિયા ગાંધીને 'વિષકન્યા' કહી દીધા હતા અને કથિત રીતે તેમના પર ચીન અને પાકિસ્તાનના એજન્ટ હોવાના પણ ધગધગતા આરોપ લગાવ્યા હતા. તો બસનાગૌડાને પણ ગુરુવારે (4 મે) સાંજે 5 વાગ્યા સુધીમાં જવાબ આપવા માટે કહેવામાં આવ્યું છે. કોંગ્રેસે બસનગૌડા વિરુદ્ધ ચૂંટણી પંચને ફરિયાદ કરી હતી.
