- પ્રીતિ ઝિંટાએ તેના ઈન્સ્ટાગ્રામ પર એક વીડિયો શેર કર્યો
- કામાખ્યા મંદિર પંહોચી પ્રીતિ ઝિન્ટા
- કહ્યું મંદિર સુધી પહોંચવા માટે તેને આખી રાત જાગવું પડ્યું
બોલિવૂડ અભિનેત્રી પ્રીતિ ઝિન્ટા ભલે લાંબા સમયથી મોટા પડદાથી દૂર હોય પરંતુ તે સોશિયલ મીડિયા દ્વારા પોતાના ફેન્સ સાથે જોડાયેલી રહે છે. જણાવી દઈએ કે પ્રીતિ ઝિંટાએ તેના ઓફિશિયલ ઈન્સ્ટાગ્રામ એકાઉન્ટ પરથી એક વીડિયો શેર કર્યો છે અને આ વીડિયોમાં પ્રીતિએ ગુવાહાટીના કામાખ્યા મંદિરની મુલાકાતની તેની સફર બતાવી છે. આ સાથે જ વિડિયોની સાથે પ્રીતિ ઝિંટાએ એક લાંબું કેપ્શન પણ લખ્યું છે જેમાં તેણે મંદિર પહોંચ્યા પછી કેવું લાગ્યું હતું એ વિશે જણાવ્યું હતું.
કામાખ્યા મંદિર પંહોચી પ્રીતિ ઝિન્ટા
હાલ વાયરલ થયેલ એ વિડિયોમાં જોઈ શકાય છે કે પ્રીતિ ઝિન્ટા પિંક કલરના સૂટમાં માથું દુપટ્ટાથી ઢાંકેલી જોવા મળે છે સાથે જ તે મંદિર પરિસરની અંદર છે, આ સાથે પ્રીતિએ મંદિરની આસપાસની દુકાનો અને તળાવની ઝલક પણ બતાવી. પ્રીતિ ઝિંટાએ વીડિયોની સાથે પોસ્ટમાં જણાવ્યું કે આ મંદિર સુધી પહોંચવા માટે તેને આખી રાત જાગવું પડ્યું.
પ્રીતિ ઝિન્ટાની પોસ્ટ
પ્રીતિ ઝિંટાએ વીડિયોની સાથે પોતાની પોસ્ટમાં લખ્યું, 'ગુવાહાટી જવાનું મારું એક કારણ પ્રખ્યાત કામાખ્યા દેવી મંદિરની મુલાકાત લેવાનું હતું. ભલે અમારી ફ્લાઇટ ઘણા કલાકો સુધી મોડી પડી અને હું આખી રાત જાગી પણ એકવાર હું મંદિરમાં પ્રવેશી ત્યારે તે બધું સાર્થક લાગવા લાગ્યું હતું. જ્યારે હું ત્યાં ગઈ ત્યારે મને પાવરફૂલ વાઇબ્રેશન અને શાંતિનો અનુભવ થયો. જો તમારામાંથી કોઈ ગુવાહાટીની મુલાકાતે જવાનું થાય, તો આ અદ્ભુત મંદિર જોવાનું ચૂકશો નહીં. જય મા કામાખ્યા - જય માતા દી. '
જણાવી દઈએ કે કામાખ્યા દેવી મંદિર માતા સતીના સૌથી શક્તિશાળી શક્તિપીઠોમાંથી એક છે જે ગુવાહાટી શહેરમાં નીલાચલ ટેકરી પર આવેલું છે.
