- રાજકોટ મનપા કમિશનર આકરા પાણીએ
- પાણીનો બગાડ કરનાર લોકો સામે દંડ થશે
- મનપા કમિશનરે 18 વોર્ડ વાઇઝ ટીમો બનાવી
રાજકોટમાં પાણી બગાડ અટકાવવા મનપા કમિશનર આકરા પાણીએ
રાજકોટ શહેરમાં લોકો પાણીનો બીન જરૂરી વેડફાટ કરતાં હોવાનું મનપાના કમિશનરે ઘ્યાનમાં આવતાં તેઓ દ્વારા ઉનાળામાં પાણીના વપરાશ મામલે કડક નિર્ણય લીધો છે. હવે રાજકોટ શહેરમાં જે કોઈ પણ પાણીનો બગાડ કરશે તો તેની સામે દંડનીય કાર્યવાહી કરવામાં આવશે. આઉપરાંત જે લોકો ઘરની બહાર ફળિયા ધોશો તો 500 રૂપિયાનો દંડ થશે.આ સાથે કમિશનરે જણાવ્યું કે, જે લોકો પાણીનો મોટા પ્રમાણમાં બગાડ કરશે તો રૂપિયા 2000નો દંડ ફટકારાશે
પાણીનો બગાડ કરનાર લોકો સામે દંડનીય કાર્યવાહી કરાશે
ઉલ્લેખનીય છે કે, રાજકોટ શહેરમાં લોકો પાણીનો બીન જરૂરી વેડફાટ કરતા હોવાનું ધ્યાનમાં આવ્યું છે. ઘણા રહીશો નળમાં આવતા પાણી દ્વારા શેરી અને ચોક તેમજ ફળિયામાં પાણીનો છંટકાવ કરે છે. ઘણા લોકો પોતાની પાણીની જરૂરિયાત પૂર્ણ થઈ ગઈ હોવા છતાં નળ ચાલુ રાખીને પાણી ગટરમાં જવા દેતા હોય છે. આમ બીન જરૂરી પાણીનો વેડફાટ થતો હોવાનું ધ્યાનમાં આવતા મ્યુનિ. કોર્પોરેશને પાણીનો વેડફાટ કરનારા સામે આકરા દંડની જોગવાઈ કરી છે. અને તેના માટે વોર્ડ વાઈઝ ટીમો બનાવી છે.
મનપા કમિશનરે 18 વોર્ડ વાઇઝ ટીમો બનાવી
સૂત્રોના જણાવ્યા મુજબ રાજકોટ શહેરના આજી અને ન્યારી ડેમ સૌની યોજના હેઠળ ચોમાસાની જેમ ભરેલા છે. આગામી વરસાદ સુધીનું પાણી રાજ્ય સરકારે ઠાલવી દીધું છે. રાજકોટને રોજ પાણી વિતરણ માટે ચિંતાની કોઇ જરૂર નથી પરંતુ ઉપલબ્ધ જળજથ્થો બચાવવાની જરૂર અને જવાબદારી સમજીને કમિશનર અમિત અરોરાએ તમામ વોર્ડમાં પાણીચોરી સામેનું ચેકિંગ શરૂ કરાવ્યું છે. તેના ભાગરૂપે દરેક વોર્ડમાં એક એક ટીમને ફિલ્ડમાં ઉતાર્યા છે. જેઓને પાણીચોરી અને બગાડ રોકવા જવાબદારી આપવામાં આવી છે.
