દારૂબંધી? / દે દારૂ: અરવલ્લીના મેઘરજમાં દારૂનો વેપલો, ડુંગરની કોતરમાં અડ્ડો જમાવી કોથળી ઢીંચી રહેલા દારૂડિયાઓનો વીડિયો વાયરલ

• અરવલ્લીના મેઘરજમાં જાહેરમાં દારૂનુ વેચાણ
• જાગૃત નાગરિકે વીડિયો ઉતાર્યો
• દેશી દારૂના વેચાણનો વીડિયો વાયરલ

ગુજરાતમાં દારુ બંધી હોવા છતા દારૂની રેલમછેલ જોવા મળતી હોય છે, રાજ્યમાં દારૂની તસ્કરી અને દારૂની હેરાફેરીની ઘટનાઓ અવાર નવાર સામે આવતી હોય છે ત્યારે અરવલ્લીના મેઘરજમાં દારૂની હાટડીઑ પર ખુલ્લેઆમ દારૂનું વેચાણ થઈ રહ્યું છે જાહેરમાં કોઈ પણ ડર વગર ડુંગરની કોતરમાં દારૂ લોકો ઢીંચી રહ્યા છે. પોલીસ પગલાં લેવાને બદલે મુકપ્રેક્ષક બની બેઠી છે.

ઈન્દિરાનગરમાં આવેલ ડુંગરની કોતરમાં જાહેરમાં દારૂનું વેચાણ
અરવલ્લીના મેઘરજમાં જાહેરમાં દારૂના વેચાણનો વીડિયો વાયરલ થઈ રહ્યો છે. ઈન્દિરાનગરમાં આવેલ ડુંગરની કોતરમાં જાહેરમાં દારૂનું વેચાણ થઈ રહ્યુ છે. તંત્રને અવારનવાર રજૂઆત કરવા છતા કોઈ નિવેડો ના આવતા આખરે એક જાગૃત નાગરિકે દારૂના વેચાણનો વીડિયો ઉતારીને વાયરલ કરી દીધો હતો. ઉલ્લેખનીય છે કે આ વિસ્તારમાં છેલ્લા ઘણા સમયથી દેશી દારૂનું વેચાણ થતુ હોવાની લોકચર્ચા છે.

મેઘરજ પોલીસ મુકપ્રેક્ષક બની?
નામ પૂરતા જ કહેવાતા ગાંધીના ગુજરાતમાં દારૂની હાટડીઓ સરેઆમ ધમધમી રહી છે. પોલીસ ફક્ત દરોડાના નામે નાટક કરી બુટલેગરોને છાવરી જ રહી હોય તેવુ લાગી રહ્યું છે. વાયરલ વીડિયોમાં સ્પષ્ટ રીતે જોઈ શકાય છે કે ઢાગલા બંધ દારૂની કોથળીઑ પડી છે કેટલાક લોકો આરામથી પોલીસના કોઈ પણ ડર વગર ઈન્દિરાનગરમાં આવેલ ડુંગરની કોતરમાં અડ્ડો જમાવી દારૂ પી રહ્યા છે. મેઘરજ પોલીસ બસ કાર્યવાહીને નામે નાટક કરી રહી છે. પોલીસનું કામ એક જાગૃત નાગરિક કરી રહ્યો છે. દારૂના વેપલાને ઉઘાડો પાડી આવી હાટડીઑ બંધ કરાવવા અરજ થઈ રહી છે ત્યારે જોવું રહ્યું કે મેઘરજ પોલીસ કોઈ કડક કાર્યવાહી કરે છે કે કેમ બસ મૂક પ્રેક્ષક બની તમાશો જોશે..

VTVના સળગતા સવાલ

• મેઘરજ પોલીસની દારૂની હાટડીઑ પર મીઠી નજર કેમ?
• દારૂબંધીના લીરા કેમ વારંવાર ઉડાડવામાં આવે છે ?
• દેશી દારૂના વેચાણની કોણ આપી રહ્યું છે મંજૂરી?
• મંજૂરી નથી આપી તો શા માટે ખુલ્લેઆમ વેચાય છે દારૂ?
• પોલીસ શા માટે દરોડા પાડીને કાર્યવાહી નથી કરતી?
• દેશી દારૂની હાટડીઓ કેમ ધમધમી રહી છે ?
• બુટલેગરે કોની રહેમ નજર હેઠળ બેફામ બન્યા છે ?
• નશાની લતના કારણે યુવાનોના અકાળે મૃત્યુ માટે કોણ જવાબદાર ?