અવલોકન / DOG કરડે અને જીવ જોખમાય તો...: પાલતુ શ્વાન પાળવા મામલે ગુજરાત HCનું અવલોકન, સુરતમાં કુતરાએ બાળકીને ભર્યું હતું બચકું

• અમદાવાદમાં પાલતું શ્વાનને પાળવાને લઇને ગુજરાત હાઇકોર્ટનું અવલોકન
• તમે શેરીના શ્વાનને ખવડાવીને કાઢી મુકો એ જ શ્વાન બીજાને કરડે છે: કોર્ટ 
• સુરતના ફૂલપાડા વિસ્તારમાં બાળકીને કુતરાએ બચકુ ભર્યુ

રાજ્યના મહાનગરો સહિત અનેક શહેરમાં રખડતા પશુનો ત્રાસ આસમાને છે. જેની ચાડી ખાતા અનેક બનાવો છાશવારે સામે આવે છે ત્યારે સુરતના ફૂલપાડા વિસ્તારમાં શ્વાનનો ત્રાસ સામે આવ્યો હતો. બીજી તરફ પાલતુ શ્વાન પાળવા મામલે હાઇકોર્ટે અવલોકન કર્યું હતું. જેમાં કોર્ટે કહ્યું કે તમે સ્ટ્રીટ ડોગને ખવડાવીને કાઢી મુકો એ જ ડોગ બીજાને કરડે છે. પરિણામે અને લોકોના જીવ જોખમાય તો જવાબદારી કોની? તેવો સવાલ કોર્ટે ઉઠાવી ગુજરાત હાઈકોર્ટે જીવદયા પ્રેમીઓને ટકોર કરી છે. શ્વાનના ત્રાસ મુદ્દે થયેલી બે વ્યક્તિઓ વચ્ચેની માથાકૂટને લઈને મુદ્દો કોર્ટમાં પહોંચ્યો હતો.

શ્વાને બચકું ભરી લેતા બાળકી ઈજાગ્રસ્ત થઇ

સુરતના ફૂલપાડા વિસ્તારની હંસ સોસાયટીમાં રખડતા શ્વાને બાળકીના ગાલે બચકું ભરી લેતા ભાગદોડ મચી ગઇ હતી. બીજી તરફ શ્વાને બચકું ભરી લેતામાં બાળકી ઈજાગ્રસ્ત થઇ છે.આથી ઇજાગ્રસ્ત નાની બાળકીને તાત્કાલિક સારવાર અર્થે હોસ્પિટલ ખસેડવામાં આવી હતી.અશ્વની કુમાર વિસ્તારમાં આ ઘટના ઘટી હતી. જેને પગલે સોસાયટીના આસપાસના લોકોમાં ફફડાટ ફેલાયો હતો. જેના CCTV ફૂટેજ પણ સામે આવ્યા છે. આ CCTVના આધારે સ્થાનિકોએ રખડતા શ્વાન પકડવા માટે મનપાના અધિકારીઓને જાણ કરી છે.

સળગતા સવાલ ?

• સુરત મનપા રખડતા શ્વાનને પકડતું કેમ નથી?
• શ્વાન જીવલેણ બન્યા તો પોણ કાર્યવાહી કેમ નથી થતી?
• રખડતા શ્વાનની સમસ્યાને મનપા સમસ્યા નથી સમજતું?
• શું કોઈ અઘટીત ઘટના બન્યા બાદ જ શ્વાન પકડવાની કામગીરી થશે?
• કોઈ અઘટીત ઘટના બનશે તો મનપા ઘટનાની જવાબદારી લેશે?