- રાજસ્થાન રોયલ્સે જે રીતે સનરાઇઝર્સ હૈદરાબાદ સામે છેલ્લા બોલે મેચ હારી ગયું
- સંદીપ શર્માએ છેલ્લા બોલ પર વિકેટ લીધી હતી પરંતુ તે નો-બોલ હતો
- આ હારનું એક મોટું કારણ કેપ્ટન સંજુ સેમસન પણ છે
રાજસ્થાન રોયલ્સે જે રીતે સનરાઇઝર્સ હૈદરાબાદ સામે છેલ્લા બોલે મેચ હારી ગયું હતું એ કારણ આ મેચ આવનારા સમયમાં દરેકના મનમાં રહેશે. એ મેચની વાત કરીએ તો બધાને યાદ હશે કે સંદીપ શર્માએ છેલ્લા બોલ પર વિકેટ લીધી હતી પરંતુ તે નો-બોલ હતો અને ત્યારબાદ ફ્રી-હિટ સિક્સર ફટકારી અને રાજસ્થાનના હાથમાંથી જીત છીનવાઇ ગઈ હતી. આ બધા વચ્ચે આ હારનું એક મોટું કારણ કેપ્ટન સંજુ સેમસન પણ છે જેને એક નહીં પરંતુ બે વખત આવી ભૂલો કરી હતી જેની ભરપાઈ ટીમે કરવી પડી હતી.
એ વાત તો નોંધનીય ચ કે સંજુ સેમસનની કપ્તાની હેઠળ રાજસ્થાને IPL 2023ની મજબૂત શરૂઆત કરી હતી પણ હવે ધીરે ધીરે પકડ ગુમાવતાં જાય છે અને તેમાં સેમસનની પણ મોટી ભૂમિકા છે. આ સિઝનમાં પહેલેથી જ કેટલીક મેચોમાં તેણે આવી ભૂલો કરી હતી, જેણે મેચનો નિર્ણય બદલી નાખ્યો હતો. જણાવી દઈએ કે 7મી મે રવિવારે જયપુરમાં હૈદરાબાદ સામે પણ કંઈક આવું જ જોવા મળ્યું હતું.
સંજુ સેમસનની બે ભૂલો
સેમસને બેટિંગમાં શાનદાર પ્રદર્શન કર્યું અને 66 રનની ઝડપી ઇનિંગ રમી પરંતુ વિકેટકીપિંગમાં એ દિવસ તેના માટે સારો નહતો. તેણે બે વખત વિકેટ લેવાની તક ગુમાવી, જેના કારણે ટીમને મોટું નુકસાન થયું. પહેલી તક 12મી ઓવરમાં મળી હતી. આ ઓવરના પહેલા બોલ પર જ અભિષેક શર્માને રનઆઉટ થવાની તક મળી હતી પણ સંજુએ ઉતાવળમાં બોલને પકડતા પહેલા જ સ્ટમ્પ પાડી દીધી હતી.એ બાદ વધુ 15 રન કરીને અભિષેક 55 રન બનાવીને આઉટ થયો હતો.
ત્યારપછી સેમસને 17મી ઓવરમાં બીજી ભૂલ કરી. આ વખતે ઓવરના બીજા બોલ પર રાહુલ ત્રિપાઠીએ લેગ સાઇડ પર આસાન કેચ આપ્યો હતો પણ સેમસને 2-3 પ્રયાસો બાદ પણ કેચ છોડ્યો હતો. રાહુલ ત્રિપાઠી પણ 40 રન પર હતો અને 47 રન બનાવીને આઉટ થયો હતો.
