- બજેટ બાદ નિર્મલા સીતારમણે કરેલી પ્રેસ કોન્ફ્રરંસમાં આપ્યું આવું નિવેદન
- કોંગ્રેસે ગણાવ્યું યુપીનું અપમાન
- નાણામંત્રીએ રાહુલ ગાંધીને લઈને આપ્યું આવું રિએક્શન
બજેટ રજૂ કર્યા બાદ નાણામંત્રી નિર્મલા સીતારમણને 'યુપી ટાઈપ' વાળા આપેલા નિવેદનથી રાજકીય ગરમાવો આવ્યો છે. ચૂંટણીની આ સિઝનમાં આ પ્રકારના નિવેદનને લઈને કોંગ્રેસે કહ્યું છે કે, નાણામંત્રીએ આવું કહીને યુપીની જનતાનું અપમાન કર્યું છે. તેમણે યુપીના લોકોને બજેટમાં કશુંયે આપ્યુ નથી પણ કમસેકમ યુપીની જનતાનું અપમાન તો ન કરો.
કોંગ્રેસ મહાસચિવ પ્રિયંકા ગાંધીએ નિર્મલા સીતારમમ પર ટાર્ગેટ કરતા ટ્વિટ કર્યું છે. તેમણે લખ્યું છે કે, નિર્મલા સીતારમણજી આપે યુપી માટે બજેટમાં કંઈ આપ્યુ નથી. ઠીક છે. પણ યુપીના લોકોનું આવી રીતે અપમાન કરવાની શું જરૂર હતી. સમજી લો. યુપીના લોકોને યુપી ટાઈપ હોવામાં ગર્વ છે. અમને યુપીની ભાષા, બોલી, સંસ્કૃતિ તથા ઈતિહાસ પર ગર્વ છે.
કોંગ્રેસે શરૂ કર્યું #યુપી મેરા અભિયાન
નાણામંત્રીની આ ટિપ્પણી બાદ કોંગ્રેસે ટ્વિટર પર જ #યુપી મેરા અભિમાનની શરૂઆત પણ કરી દીધી છે. યુપી કોંગ્રેસના ટ્વિટર હૈંડલ પર લખ્યું છે કે, નિર્મલા સીતારમણે પોતાના શરમજનક નિવેદનથી ફક્ત યુપીના બૌદ્ધિક ઈતિહાસ અને ચેતનાને નહીં, પણ સમગ્ર રાજ્યની જનતાને અપમાનિત કર્યા છે. યુપીની જનતા આ અપામનનો બદલો જરૂરથી લેશે.
શું છે સમગ્ર મામલો
હકીકતમાં કોંગ્રેસ નેતા રાહુલ ગાંધીએ બજેટ પર પ્રહાર કરતા કહ્યુ હતું કે, મોદી સરકારનું બજેટ શૂન્ય છે. તેમાં સેલરી ક્લાસ, મીડલ ક્લાસ, ગરીબ-વંચિત, યુવાનો, ખેડૂતો અને એમએસએમઈ સેક્ટર માટે કશું નથી. બજેટ બાદ થયેલી પ્રેસ કોન્ફરંસમાં નિર્મલા સીતારમણે રાહુલ ગાંધીની ટિપ્પણીનો જવાબ આપવા નાણા રાજ્ય મંત્રી પંકજ ચૌધરીને આપવા કહ્યું. તેના પર ચૌધરીએ કહ્યું કે, રાહુલ ગાંધીને બજેટ સમજમાં નથી આવ્યું. બજેટમાં તમામ સેક્ટર માટે જાહેરાત કરવામાં આવી છે.
નિર્મલા બોલ્યા- યુપી ટાઈપ જવાબ આપ્યો
નાણારાજ્યમંત્રી પંકજ ચૌધરીના જવાબને આગળ વધારતા સીતારમણે કહ્યું કે, ચૌધરીએ ટિપિકલ યુપી ટાઈપ જવાબ આપ્યો છે. મને લાગે છે કે, યુપીથી ભાગનારા સાંસદ માટે આટલુ બસ છે. રાહુલે જે કેટેગરીનો ઉલ્લેખ કર્યો છે, તેના વિશે મેં બજેટમાં કંઈને કંઈ કહ્યું છે. નાણામંત્રી અહીંથી અટક્યા નહીં. આગળ કહ્યું કે, મને એ પાર્ટી પર દયા આવે છે, જેની પાસે એક એવા નેતા છે, જે ફક્ટ ટિપ્પણી કરવાનું જાણે છે, હું ટિકા ટિપ્પણી સહન કરવા માટે તૈયાર છું. પણ એમના માટે નહીં જે હોમવર્ક કર્યા વગર આવે છે.
