- હિંમતનગરના ગાંભોઈ વિસ્તારનો ચોંકાવનારો બનાવ
- જમીનમાંથી આવતો હતો બાળકનો રડવાનો અવાજ
- બાદમાં 108 મારફતે બાળકીને હોસ્પિટલ લઈ જવાઈ
સાબરકાંઠાના હિંમતનગરના ગાંભોઈ વિસ્તારમાંથી એક ચોંકાવનારી ઘટના સામે આવી છે. ગાંભોઈ UGCVL ઓફિસની બાજુમાં એક નવજાત બાળકનો રડવાનો અવાજ આવતો હતો. જેથી ત્યાં હાજર શ્રમિકોએ રડવાનો અવાજ આવતા તેઓએ સ્થાનિકોને જાણ કરી.
જમીન ખોદતા જીવિત હાલતમાં બાળકી મળી આવી
આથી બાળકના રડવાના અવાજના પગલે જ્યારે જમીન ખોદવામાં આવી તો અંદરથી જીવિત હાલતમાં બાળકી મળી આવી. આથી, તુરંત બાળકીને 108 મારફતે હોસ્પિટલ લઈ જવાઈ. આ મામલે ગાંભોઈ પોલીસને પણ જાણ કરાઈ. પોલીસે આ સમગ્ર મામલે વધુ તપાસ હાથ ધરી છે. જો કે, આ પ્રકારનું કૃત્ય કરનારની સામે લોકો ફિટકાર લગાવી રહ્યાં છે.
આ મામલે બાળક જન્મ્યા પછી તેની નાડ પણ કાપવામાં નથી આવી અને જન્મ બાદ તુરંત તેને જમીનમાં દાટી દીધી હોવાની આશંકા વ્યક્ત કરવામાં આવી રહી છે. જો કે, આ નવજાત શિશુને અહીં કોણ દાટીને જતું રહ્યું અને તેની પાછળ શું કારણ જવાબદાર છે તેને લઈને અનેક તર્ક-વિતર્ક થઈ રહ્યાં છે.
બાળકીને જમીનમાં દાટવા પાછળ અનેક તર્ક-વિતર્ક
જો કે, હાલમાં પોલીસ તપાસ બાદ જ આ તમામ સવાલોના જવાબ સામે આવી શકે છે. પરંતુ અહીં પ્રશ્ન એ થાય છે કે, આખરે આટલું ખરાબ કૃત્ય કરીને જે-તે વ્યક્તિને શું મળ્યું હશે? આ તો ઠીક છે કે બાળકી જીવિત નીકળી પણ જો મરી ગઇ હોત તો! સાથે કેટલાં દિવસથી આ બાળકીને દાટી હશે તે પણ એક મોટો પ્રશ્ન છે. ત્યારે હવે આ સમગ્ર મામલે પોલીસ દ્વારા આગળની કાર્યવાહી હાથ ધરવામાં આવી છે.
