સ્પષ્ટતા / નેતાઓ, દરેક વાતને રાજકીય રંગ આપવાનું બંધ કરો: કથાકાર રમેશ ઓઝાએ ઢોર મુદ્દે ફરી આપ્યું નિવેદન

 

• પશુઓ અંગે કથાકાર રમેશભાઈ ઓઝાનું નિવેદન
• શહેરના સમીપવર્તી ગામો શહેરમાં ભળતા જાય છેઃ કથાકાર
• વ્યાસપીઠ પરથી જનતાના હિત માટે હોય તે વાત કહેવાય છેઃ રમેશભાઈ ઓઝા

મોરબીમાં ચાલી રહેલી ભાગવત સપ્તાહના વ્યાસપીઠ પરથી કથાકાર રમેશ ઓઝાએ પશુપાલકો અંગે કરેલી ટિપ્પણીને લઈને વિવાદ સર્જાયો છે. માલધારી મહાપંચાયત દ્વારા કથાકારનો વિરોધ કરવામાં આવી રહ્યો છે. ત્યારે હવે પશુઓ અંગે કથાકાર રમેશ ઓઝાનું નિવેદન સામે આવ્યું છે. 

પુજનીય ગાયોની દશા દયનીય કરી નાખી: રમેશ ઓઝા

જાણીતા કથાકાર રમેશ ઓઝાએ કહ્યું કે, 'મને દુઃખ એ વાતનું થાય છે કે જે ગાય માતાને આપણે પૂજનીય માનીએ છીએ, તેની દશા આપણે કેવી દયનીય કરી નાખી છે. સરકારે અને જે પાળતા હોય એ બધાએ આ બાબતે વિચાર કરીને જાગૃત થવાની જરૂર છે. શહેરીકરણ વધતુ જાય છે અને શહેરના  સમીપવર્તી ગામો શહેરમાં ભળતા જાય છે. સાથે શહેરનો વિસ્તાર વધતા જાય છે. તે ગામોના પશુઓ માટે વૈકલ્પિક વ્યવસ્થા સરકારે શું કરી અથવા તો કંઇક એવું થવું જોઈએ કે રસ્તે રઝળતા પશુઓ ટ્રાફિકમાં પણ સમસ્યા ન ઉભી કરે.'

વ્યાસપીઠ પરથી કહેવાય છે તે કોઈ સમાજને ધ્યાનમાં રાખીને નથી કહેવાતું: રમેશ ઓઝા

તેઓએ જણાવ્યું કે, 'વ્યાસપીઠ ઉપરથી જે કહેવાય છે તે કોઈ સમાજ વિશેષને ધ્યાનમાં રાખીને નથી કહેવાતું. સમગ્ર રીતે જનતાના હિત માટેની જે વાત હોય તે કહેવાતી હોય છે. આ સમસ્યા છે એ જનતા પણ કબૂલ કરે છે. હાઈકોર્ટે પણ નોંધ્યું છે અને નરીઆંખે દેખાય છે કે રસ્તાઓ ગૌશાળા બનેલા છે. દરેક સમસ્યાને રાજકીય રંગ આપવાનું બંધ કરો નેતાઓ. જો તમે જનકલ્યાણની વાતો કરતા હોય તો જનતાની માટે વિચારો. અહીંયા કોઈ પાર્ટીની વાત નથી, સમગ્ર રીતે જનતાના કલ્યાણની વાત છે.'

ગતરોજ કરેલી ટિપ્પણી પર રમેશ ઓઝાએ કહ્યું કે, 'નિશ્ચિતપણે મારું દુર્ભાગ્ય છે કે મેં સદભાવના સાથે કહેલી વાતને એ લોકો દુર્ભાગ્યપૂર્ણ કહે છે.  મેં એક નાગરિક તરીકે જે સમસ્યા છે, તેને તમારી સામે મૂકી છે.' 

ગૌ સેવા કર્યા વગર તેનું દૂધ પીશો તો તે પચશે નહીંની કરી હતી ટિપ્પણી
 
મોરબી ખાતે કોરોના દિવંગતોના મોક્ષાર્થે ભાગવત સપ્તાહ ચાલી રહી છે. શ્રીમદ્દ ભાગવત કથાકાર રમેશ ઓઝા દ્વારા કથાનું રસપાન કરવામાં આવી રહ્યું છે. ત્યારે ગઈકાલે વ્યાસપીઠ ઉપરથી કથાકાર રમેશ ઓઝાએ ગૌવંશને રસ્તા પર રઝડતા છોડી દેનાર પશુપાલકોને ટકોર કરતા જણાવ્યું હતું કે, 'નગર-નગરના રસ્તા-રસ્તા ગૌશાળા બની ગયા છે. હાઈકોર્ટે પણ સરકારને પગલા ભરવા કહ્યું છે. માલધારીઓ ગામના જોખમે અને ખર્ચે તમે દૂધ પીવાનું બંધ કરો, ગૌ સેવા કર્યા વગર તેનું દૂધ પીશો તો તે પચશે નહીં.' 

 

રમેશભાઈએ વ્યાસપીઠની ગરીમાનું ન રાખ્યું ધ્યાન: નાગજી દેસાઈ

જે બાદ માલધારી મહાપંચાયતના પ્રવક્તા નાગજી દેસાઈએ જણાવ્યું હતું કે, 'કથાકાર રમેશભાઈ ઓઝાએ માલધારી સમાજ વિરુદ્ધ જે ઉચ્ચારણો અને જે ભાષા-શબ્દનો ઉપયોગ કર્યો છે, તે કથાકાર તરીકે અને ધાર્મિક સંત તરીકે દુર્ભાગ્ય પણ ગણી શકાય. આવા કથાકારો અને સંતોને કારણે 98 ટકા સારા સંતો અને કથાકારોને નીચું જોવું પડે છે. વ્યાસપીઠ ઉપરથી માલધારી સમાજને ઠપકો આપ્યો, વ્યાસપીઠની ગરીમા જ તેમને ખબર નથી કે તેની કેટલી મોટી ગરીમા છે.'